Qazaxıstan məktəblərində süni intellekt tətbiq olunacaq
Astana, 12 may, AZƏRTAC
Qazaxıstan Prezidenti Kasım-Jomart Tokayev “Qazaxıstan Respublikasının orta təhsil sisteminə süni intellektin tətbiqi üzrə tədbirlər haqqında” fərman imzalayıb.
AZƏRTAC Qazaxıstan Prezidentinin mətbuat xidmətinə istinadla xəbər verir ki, fərmanın əsas məqsədi süni intellektin sürətlə yayılması fonunda ölkənin davamlı inkişafını təmin etmək, həmçinin insan kapitalının əsas elementi kimi müasir və innovativ təhsil sisteminin formalaşdırılması üçün şərait yaratmaqdır.
Fərmana uyğun olaraq, hökumət 2026-cı il iyulun 1-dək 2026–2029-cu illər üzrə süni intellektin orta təhsil sistemində geniş tətbiqinə dair Kompleks Tədbirlər Planını təsdiqləyəcək. Plan fərdiləşdirilmiş təhsil mexanizminin yaradılmasını, rəqəmsal infrastrukturun formalaşdırılmasını, pedaqoji kadrların hazırlanmasını və şagirdlərin şəxsi məlumatlarının qorunmasını nəzərdə tutur. Yeniliklər şəhər və kənd məktəbləri arasında təhsilin keyfiyyəti baxımından fərqin azaldılmasına yönəlib.
2026-cı il avqustun 1-dək pilot layihə çərçivəsində məktəblərin texniki təchizatı, o cümlədən sabit yüksəksürətli internetlə təminatı həyata keçiriləcək. 2026-cı il sentyabrın 1-dək orta təhsil sistemində süni intellektin tətbiqi üzrə standartlar təsdiqlənəcək, həmçinin pedaqoqların fasiləsiz peşəkar inkişafını və süni intellekt texnologiyalarından tədris prosesində müəllimlərin peşə fəaliyyətinə zərər vurmadan və onu əvəz etmədən əlavə səmərəli alət kimi istifadəni nəzərdə tutan tədbirlər planı qəbul ediləcək.
Bölmənin digər xəbərləri
