Milli ruhun və zərifliyin canlı nəğməsi - Azərbaycan Dövlət Rəqs Ansamblı
Laçın, 3 iyun, Gülay Nəzərova, AZƏRTAC
Azərbaycanın zəngin mədəniyyətinin parlaq güzgüsü olan Azərbaycan Dövlət Rəqs Ansamblı uzun illərdir ki, milli dəyərlərimizi qoruyub yaşadır, eyni zamanda, bu inciləri dünyaya böyük fəxr və sevgi ilə tanıdır. Ansambl yalnız ölkəmizin deyil, dünyanın ən mötəbər səhnələrində də ulduz kimi parlayır.
Azərbaycan Dövlət Rəqs Ansamblının səhnə dili – rəngarəng, obrazlı və duyğulu bir dastandır. Bu dastanda hər addım, hər baxış və hər ritm xalqımızın tarixini, əzmkarlığını və sevincini əks etdirir. Ansambl üzvləri AZƏRTAC-ın müxbiri ilə söhbətində Azərbaycanın işğaldan azad olunan torpaqlarında qürurla təqdim etdikləri proqramlardan, həmçinin dünyanın müxtəlif guşələrində mədəniyyətimizi təbliğ etmək missiyalarından danışıblar.
Ansambl, həmçinin bu gün Laçın şəhərində “MDB-nin mədəniyyət paytaxtı-2025” ili çərçivəsində təşkil edilən möhtəşəm konsert proqramında çıxış ediblər.
Azərbaycan Dövlət Rəqs Ansamblının solisti Aytən Bünyatova bildirib ki, azad olunan ərazilərdə çıxış etmək həm böyük məsuliyyət, həm də qürur hissidir.
"Dünyanın bir çox ölkələrində keçirilən festivallarda, konsert proqramlarında milli rəqslərimizi nümayiş etdirərək, Azərbaycan mədəniyyətinin zənginliyini və rəngarəngliyini xarici tamaşaçılara çatdırmışıq. Azad olunan ərazilərimizdə çıxış etmək isə olduqca duyğulu bir hissdir. Bu torpaqlarda səhnəyə çıxmaq, öz rəqsimizlə milli kimliyimizi, tariximizi və mədəni irsimizi yaşatmaq sözlə ifadə olunmayacaq qədər qürurvericidir", - deyə A.Bünyatova qeyd edib.
Azərbaycan Dövlət Rəqs Ansamblının solisti və repetitoru Saina Əhmədova mayın 24-də Şuşada keçirilən "Xarıbülbül” Beynəlxalq Musiqi Festivalından sonra Laçında çıxış etməyin çox sevindirici və qürurverici olduğunu diqqətə çatdırıb. "Azad olunmuş torpaqlarımızda səhnəyə çıxmaq, milli sənətimizi orada yaşatmaq hər birimizin həyatında unudulmaz və tarixi bir an kimi qalacaq", - deyə S.Əhmədova diqqətə çatdırıb.
Rəqqas Rifan Qəhrəmanov 2017-ci ildən Azərbaycan Dövlət Rəqs Ansamblında çalışdığını deyib: "Bu illər ərzində ölkəmizin müxtəlif regionlarında, eləcə də xarici ölkələrdə keçirilən çoxsaylı tədbirlərdə, festivallarda və konsert proqramlarında iştirak etmişik. Hər bir çıxış həm sənətimizi nümayiş etdirmək, həm də milli mədəniyyətimizi təbliğ etmək üçün dəyərli fürsət olub", - deyə o diqqətə çatdırıb.
Milli rəqsimizin daşıyıcıları
Azərbaycan Dövlət Rəqs Ansamblı bu gün də görkəmli rəqqas və xoreoqrafların açdığı yolla addımlayır, ruhun və ənənənin harmoniyasını böyük qürurla yaşadır. Onlar xalqımızın rəqs mədəniyyətini qəlbən qoruyur, onu dünya səhnələrində parlaq bir bayraq kimi dalğalandırırlar.
Səhnədə atılan hər addım, edilən hər hərəkət minilliklərin yaddaşından süzülüb gələn dərin kökləri təcəssüm etdirir. “Köçəri”nin azad ruhu, igidlik və cəsarətin simvolu olan “Cəngi”, “Qaytağı”nın duyğulu naxışları və incə bir nazla süzülən “Sarı gəlin” — bunlar təkcə rəqs deyil, milli yaddaşımızın səhnədə canlanan obrazlarıdır.
Milli rəqsimiz – bu, sadəcə, addımlar və hərəkətlər deyil, Azərbaycan ruhunun canlı, şirin nəğməsidir. Bu nəğmənin daşıyıcıları isə Azərbaycan Dövlət Rəqs Ansamblının üzvləridir.
Bölmənin digər xəbərləri
