Mingəçevir Dövlət Universitetində respublika elmi konfransının bölmə iclasları keçirilib
Bakı, 14 dekabr, AZƏRTAC
Mingəçevir Dövlət Universitetində (MDU) “Regional inkişafın təmin olunmasında innovativ tendensiyalar: reallıqlar və müasir çağırışlar” mövzusunda respublika elmi konfransının “Təhsil və humanitar”, “Təbiət və texnika” və “İqtisadiyyat və idarəetmə” bölmələri üzrə iclasları keçirilib.
Universitetdən AZƏRTAC-a bildirilib ki, “Microsoft Teams” platforması üzərindən onlayn formatda keçirilən bölmə iclaslarında həm MDU-nu, həm də respublikanın digər ali təhsil müəssisələrini və elmi-tədqiqat institutlarını təmsil edən tədqiqatçıların məruzələri dinlənilib.
“Təhsil və humanitar” bölməsinin iclasında Bakı Dövlət Universitetinin dosenti Gülarə Kərimova “Təhsildə innovasiyalar dövrün mühüm tələbidir”, MDU-nun baş müəllimi İlham Məmmədov “Azərbaycan qlobal yeniliklər astanasında”, MDU-nun dosentləri Sahib Mustafayev “Riyaziyyat təlimində şagirdlərin vizüal-qrafiki informasiyanı riyaziləşdirmə bacarıqlarının inkişaf etdirilməsi”, Vəfa Məhərrəmova “İngilis dilinin tədrisində İKT əsaslı fəaliyyətlərin rolu”, Azərbaycan Respublikasının Prezidenti yanında Dövlət İdarəçilik Akademiyasının müəllimi Fəridə Mövsümova “Humanitar və hüquqi sahədə innovasiyalar”, Gəncə Dövlət Universitetinin müəllimi Saidə Nəsibova “Müasir təhsil sistemində təlim texnologiyalarının tətbiqi məsələləri”, MDU-nun müəllimləri Xədicə Əliyeva “İngilis dilinin tədrisi zamanı sözlərin öyrənilməsində son innovasiyalar”, Sevinc Səmədova “Müasir dövrdə Azərbaycan təhsil sisteminin modernləşdirilməsi”, Səadət Ağakişiyeva “Müasir uşaq ədəbiyyatına innovativ yanaşma” və Ayna Babazadə “Tədqiqatlarda İKT imkanlarından istifadə” mövzularında çıxış ediblər.
“Təbiət və texnika” bölməsinin iclasında Bakı Mühəndislik Universitetinin dosenti Hüseyn Mirzəyev “Lift qapılarının dirsək-sürüngəclı mexanizmlərinin müqayisəli analizi”, MDU-nun dosenti Mehman Rəsulov “Məxsusi ədədlərin paralel axtarışı”, Sumqayıt Dövlət Universitetinin dosenti Nərgiz Aşurova “Sumqayıt sənaye zonasının biomüxtəlifliyinin öyrənilməsi”, MDU-nun baş müəllimi Asudə Abdurrahmanova “Neft quyularının hasilatının ölçülməsinin dolayı üsulu”, MDU-nun müəllimləri Liliya Süleymanova “Polimer-qazboşalması qarşılıqlı təsiri üsulu ilə H2O2-nin sintezi”, Gülmira Məmmədova “İçməli suyun keyfiyyətinə qoyulan tələblər”, Azərbaycan Texniki Universitetinin baş müəllimi, doktorant Anar Hacıyev “Ştanqlı quyu nasosları üçün yeni konstruksiyalı balansirsiz mancanaq dəzgahı” və MDU-nun dosenti Vüqar Mustafayev “Oynaqlı dördbəndli yastı lingli mexanizmdə bir sintez məsələsi” mövzularında çıxış ediblər.
“İqtisadiyyat və idarəetmə” bölməsinin iclasında Lənkəran Dövlət Universitetinin dosenti Gülbəniz Əliyeva “Azərbaycanın innovasiya strategiyasının əsas istiqamətləri”, MDU-nun baş müəllimi Günəş Şəfaqətov “Azərbaycanın sosial-iqtisadi inkişafında innovasiyanın rolu: mövcud vəziyyət və perspektivlər”, AMEA İqtisadiyyat İnstitutunun şöbə müdiri Mayis Gülalıyev “COVID-19 pandemiyasının ərzaq idxalına tələb funksiyasına təsirinə metodoloji baxış”, MDU-nun baş müəllimi Nazim Niftəliyev “Azərbaycanda iqtisadi transformasiyalar şəraitində dövlətin innovasiya siyasətinin strateji aspektləri”, MDU-nun müəllimləri Xəyalə Xəlilova “Kooperasiyalaşmanın aqrar sahənin inkişafında rolu”, Saqib Məmmədov “İqtisadiyyatın diversifikasiyasının Azərbaycanın müasir iqtisadi inkişafında rolu” və Azərbaycan Texniki Universitetinin baş müəllimi Günay Əliyeva “Elmi innovasiyalarin qloballaşan ali təhsilə təsiri” mövzularında çıxış ediblər.
Məruzələr dinlənildikdən sonra mövzular ətrafında geniş müzakirələr aparılıb, iştirakçıları maraqlandıran suallar cavablandırılıb.
Qeyd edək ki, MDU-nun ev sahibliyi ilə keçirilən elmi konfransın əsas məqsədi iştirakçılara seçilmiş mövzu üzrə həyata keçirdikləri tədqiqatların nəticələrini təqdim etmək, müvafiq mövzular ətrafında diskussiyalar aparmaq və gələcək elmi fəaliyyətlərin konturlarını müəyyən etmək imkanı yaradılmasından ibarət olub.
Üç bölmə və 12 istiqaməti əhatə edən konfransa respublikamızın 22 ali təhsil müəssisəsini, AMEA-nın 8 sahə elmi-tədqiqat institutunu və digər 6 təşkilatı təmsil edən 270 nəfər müəllifdən ümumilikdə 230 məqalə və tezis təqdim olunub.
Bölmənin digər xəbərləri
