Misirli tədqiqatçı: Şuşanın azad edilməsi Dağlıq Qarabağ münaqişəsinin nizama salınmasında həlledici məqamdır
Qahirə, 9 noyabr, AZƏRTAC
Şuşa şəhərinin işğaldan azad edilməsi Dağlıq Qarabağ münaqişəsinin nizama salınmasında həlledici məqamdır. Çünki bu qədim Azərbaycan şəhəri Qarabağın qapısıdır.
Bu fikri AZƏRTAC-ın müxbirinə müsahibəsində misirli yazıçı və tədqiqatçı, “Qarabağ: Qafqazda sülhə aparan yol” kitabının müəllifi Əhməd Abdo Tərabik söyləyib. O əlavə edib ki, bu gün Azərbaycan Prezidenti İlham Əliyevin Şuşa şəhərinin erməni işğalından azad edilməsini bəyan etməsi bütün Qarabağın taleyi üçün həlledici məqam oldu. “İstər tarixi və mədəni, istərsə də strateji əhəmiyyəti ilə digər bölgələrdən tamamilə fərqlənən Şuşanın azad edilməsi 30 ildir davam edən işğala son qoyulması və yaxın vaxtlarda regionda sülhün bərqərar olmasının mühüm amilidir. Bu, demək olar ki, həlledici məqamdır”, - deyə Tərabik vurğulayıb.
Misirli tədqiqatçı bildirib ki, öz kitabında da Qarabağ xanlığının ən önəmli şəhəri olmuş, XVIII-XIX əsrlərdə iri mədəniyyət və siyasi mərkəz rolunu oynamış, dahi şairlərin, müğənni və bəstəkarların vətəninə çevrilmiş bu qədim şəhər 1992-ci ildə erməni qəsbkarları ilə müharibə zamanı da ciddi dağıntılara məruz qalıb. Ermənilər buradakı Azərbaycan xalqına məxsus mədəni irs abidələrini dağıdıb, bütün Qarabağ ərazisində məscidləri xaraba qoyub, yaxud təhqir ediblər. Şuşada əhalinin böyük əksəriyyəti də yerli azərbaycanlılar olub, çox az sayda erməni sonradan bu şəhərə köçürülüb. 1989-cu ildə Şuşada əhalinin siyahıya alınması nəticələrinə görə, 20 579 nəfər şəhər sakininin 19036 nəfəri azərbaycanlı, cəmi 1377 nəfəri erməni olub. Bu qədim şəhərin yerli sakinləri olan azərbaycanlılar Ermənistanın işğalı nəticəsində doğma yurd-yuvalarından didərgin düşüblər.
Ə.Tərabik deyib ki, məscidləri viran qoyan və təhqir edən ermənilər guya İslam dəyərlərinə hörmətlə yanaşdıqlarını nümayiş etdirmək məqsədilə Şuşada bir məscidi nümunə kimi saxlayıblar. “Bunun riyakarlıq olduğunu hamımız başa düşürdük. Nəhayət ki, haqq-ədalət öz yerini tapdı. Şuşanın yerli sakinləri uzun sürən həsrətdən sonra doğma şəhərin qayıdacaqlar. Azərbaycanın dostları olaraq, biz hamımız buna sevinirik”, - deyə misirli tədqiqatçı sonda vurğulayıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
