Kişineu, 11 iyun, AZƏRTAC 

Moldova parlamenti Qara Dəniz İqtisadi Əməkdaşlıq Təşkilatı Parlament Assambleyasındakı (QİƏTPA) sədrliyini rotasiyaya müvafiq olaraq Rumıniya parlamentinə verib.

AZƏRTAC Moldova parlamentinin mətbuat xidmətinə istinadla xəbər verir ki, mərasim QİƏTPA-nın Moldova parlamentinin təşkilatçılığı ilə keçirilən 45-ci sessiyasının sonunda keçirilib.

İclasda Azərbaycanın QİƏTPA-dakı parlament nümayəndə heyətinin rəhbəri vəzifələrini icra edən, qurumun İqtisadi, ticari, texnoloji və ekoloji məsələlər komissiyasının sədri Musa Quliyevin başçılığı ilə Azərbaycan nümayəndə heyəti iştirak edib.

Sessiyada QİƏTPA-nın statusunun möhkəmləndirilməsi haqqında Bəyannamə qəbul edilib. Ermənistan istisna olmaqla, 11 ölkənin nümayəndə heyətləri bu sənədə səs veriblər. Sənəd qurumun beynəlxalq vəziyyətə və regional kontekstli dəyişikliklərə və çağırışlara səmərəli reaksiya verəcək tamhüquqlu beynəlxalq parlament təşkilatına çevrilməsini nəzərdə tutur.

Sənəddə deyilir: “QİƏTPA öz rolunu, nüfuzunu, səmərəliliyini, habelə Qara dəniz regionunda və qurumun üzvü olan hər bir dövlətdə fəal oyunçu olmağa sadiqliyini artırmağa hazır olduğunu təsdiq edir”.

Bəyannaməni Qara dəniz İqtisadi Əməkdaşlıq Təşkilatının iştirakçısı olan ölkələrin bütün parlamentlərinin sədrləri imzalamalıdırlar. Sonra bəyannamə QİƏT ölkələrinin Xarici İşlər Nazirləri Şurasında müzakirə ediləcək.

Moldova parlamentinin sədri Andrian Kandu QİƏTPA-nın sessiyası başa çatandan sonra deyib: “QİƏTPA-nın statusunun möhkəmlənməsi daha çox ölkəni cəlb edəcək və məqsədimizə çatmağa kömək edəcək. Regionda vəziyyət mürəkkəbdir. Amma zamanın sınağına davam gətirməliyik”.

QİƏTPA-ya sədrlik rəmzi olaraq Rumıniya parlamentinin qurumdakı nümayəndə heyətinin rəhbəri Vlad Nistora təqdim edilib. O, Rumıniya Senatının sədri Kelin Popesku-Teriçanunun QİƏTPA ölkələri deputatlarının ünvanına müraciətini səsləndirib.

Müraciətdə deyilir: “Rumıniya sədrlik Qara dəniz regionunun sabitlik, demokratiya və firavanlıq zonasına çevrilməsinə yönəlmiş bütün təşəbbüs və layihələri dəstəkləmək, QİƏTPA-nın resurslarından və onun digər regional və subregional əməkdaşlıq qurumları ilə işləməyə və bu resursları üzv ölkələrin çoxunun Avropa yolu kontekstində mənimsəməyə hazır olmasından maksimum istifadə etmək, Aİ siyasətçiləri və vasitələrinin həmin regionla bağlı təqdim etdiyi bütün imkanlardan - Qara dəniz strategiyasından, Aİ-nin Dunay regionu üzrə strategiyasından, inteqrasiya edilmiş su siyasətindən və s. istifadə etmək niyyətindədir”.

QİƏTPA-nın növbəti iclası bu il noyabrın 26-27-də Buxarestdə keçiriləcək. Gündəlikdə QİƏT ölkələrində korrupsiyaya, mədəni dəyərlərin qanunsuz dövriyyəsinə qarşı mübarizə və e-idarəetmə üzrə hüquq çərçivələrinin tənzimlənməsi məsələlərinin müzakirəsi nəzərdə tutulub.

Zeynal Ağazadə

AZƏRTAC-ın xüsusi müxbiri

Kişineu