Bakı, 8 sentyabr, Gülay Nəzərova, AZƏRTAC

Azərbaycan musiqisinin ən dəyərli incilərindən biri də muğamdır. Bu sənət əsrlər boyu xalqın ruhunu, duyğularını yaşadıb və gələcək nəsillərə ötürüb. Muğam insanın daxili dünyasının səsi, könlün dərinliyindən gələn bir etirafdır. Qədim el məclislərindən bu günün böyük səhnələrinədək muğam öz dəyərini itirməyib, əksinə, yeni ifaçıların səsi ilə təzədən doğulub. Bu gün də gənc xanəndələr onun sehrini qorumaqla yanaşı, ona yeni nəfəs bəxş edirlər. Onlardan biri də istedadı və zəhməti ilə seçilən əslən Laçından olan gənc muğam ifaçısı Yusif Cəfərbəylidir.

İlk olaraq, müsahibimizə muğamın onun üçün nə ifadə etdiyini soruşduq: “Muğam mənim üçün sözlərin çatdıra bilmədiyi hisslərin musiqi ilə danışması, ruhun ən dərin qatlarını oyatmasıdır. Hər not ürəyimdən doğan bir pıçıltı, hər səs isə qəlbimin sirli sədasıdır. İfa etdikcə o duyğular mənimlə yaşayır, dinləyicilərin qəlbinə yol tapır və muğamın sehrli aləminə aparır – orada hər hiss, hər fikir musiqi ilə nəfəs alır”.

Musiqi mənim üçün həyatın bir parçasıdır

Yusifin musiqiyə marağı uşaqlıq illərində formalaşıb və ailəsinin təsiri ilə daha da güclənib. Onun üçün muğam sadəcə bir sənət yox, həm də özünüifadə etməyin, insanlarla səmimi ünsiyyət qurmağın yoludur. Səsi, ifa tərzi və səhnədə yaratdığı təbii doğmalıq ona dinləyicilərin rəğbətini qazandırıb. Gənc ifaçı musiqi yoluna Bakı şəhərindəki Niyazi adına 22 nömrəli Musiqi məktəbində başlayıb. İlk olaraq tar sinfində, sonra isə xanəndəlik sinfində təhsil alıb. Ona muğamın sirlərini ilk dəfə müəllimi xanəndə Kamilə Abdullayeva öyrədib.

Yusifin məktəbin özfəaliyyət dərnəyində çıxışları və bayram tədbirlərindəki ifaları həmişə dinləyicilər tərəfindən sevilib. Onun sözlərinə görə, həmin illərdə səhnəyə çıxmaq onun üçün həm həyəcan, həm də böyük sevinc idi.

“Bizim ailədə peşəkar musiqiçi olmayıb, amma xalq musiqisinə, muğamımıza və aşıq sənətinə qarşı həmişə dərin bir sevgi olub. Mən bunu həm də Laçın torpağına bağlılığımızla izah edirəm. Şuşa, Laçın və Şərqi Zəngəzur bölgələri tarixən musiqi ilə nəfəs alan yerlər olub. Bu diyarların hər guşəsində yetişən Azərbaycan musiqi mədəniyyətinə dəyərli izlər qoyublar. Elə bu gün də həmin ruh və musiqi ənənəsi biz gənclərin qəlbində yaşayır. Musiqi mənim üçün həyatın bir parçasıdır”, - deyə Yusif bildirib.

Muğamın gələcəyinə inam

Azərbaycan muğam sənətinin qorunması və inkişafında Birinci vitse-prezident Mehriban xanım Əliyevanın diqqət və dəstəyi, eləcə də dövlət tərəfindən göstərilən davamlı qayğı böyük rol oynayır. Dövlətin diqqət və qayğısı sayəsində muğam sənətimiz gənc istedadlar tərəfindən öyrənilir, inkişaf etdirilir və geniş auditoriyaya çatdırılır.

Belə ki, Heydər Əliyev Fondunun dəstəyi ilə 2005-ci ildən bəri keçirilən “Muğam” televiziya müsabiqələri bu baxımdan mühüm əhəmiyyət daşıyır, gənclərin istedadını üzə çıxarmaq və onları peşəkar səhnəyə hazırlamaq üçün unikal bir platforma rolunu oynayır.

Gənc xanəndə IX “Muğam” televiziya müsabiqəsinin finalçısı olaraq da diqqət çəkib. Zəhməti və istedadı sayəsində Yusif bu gün gənc muğam ifaçıları arasında özünəməxsus yer tutur. Onun sözlərinə görə, muğam müsabiqəsində iştirak edərək həm özünü sınayıb, həm də sənətə olan sevgisini göstərmək fürsəti əldə edib: “Hər çıxışımda çalışırdım ki, notların hər biri dinləyicilərin qəlbinə toxunsun, muğamın mənəvi gücü və bənzərsiz melodiyaları onlara hiss etdirilsin. Bu yolda mənim ən böyük dəstəkçim müəllimim, Əməkdar artist, xanəndə Təyyar Bayramov oldu. O, mənə sənətin sirlərini öyrətdi, səhnədə özüməinamlı çıxış etməyimə yol göstərdi. Bu müsabiqə mənə həm təcrübə qazandırdı, həm də sənət yolumda motivasiya oldu. Hər yeni ifa mənim üçün öyrənmə prosesi, bir ilham mənbəyi idi”, – deyə Yusif diqqətə çatdırıb.

Təşkilatçılıq işləri mənə liderlik bacarıqlarımı inkişaf etdirməyə kömək etdi

Gənc ifaçının ən yaddaqalan uğurlarından biri 2016-cı ildə Nizami Gəncəvinin 875 illik yubileyinə həsr olunmuş baxış-müsabiqədə “N.Gəncəvinin sözlərinə ən yaxşı muğam ifası” nominasiyasına layiq görülməsi olub. Orta məktəbi bitirdikdən sonra Yusif Azərbaycan Dövlət İqtisad Universitetində (UNEC) dünya iqtisadiyyatı ixtisası üzrə bakalavr təhsili alıb. Universitetin ictimai-mədəni tədbirlərində fəal iştirak edib və İqtisadçı Vətənpərvərlər Təşkilatının sədri olub.

O deyir ki, tələbələrlə işləmək onun üçün həmişə böyük motivasiya mənbəyidir.

Yusif, həmçinin Azərbaycan Dövlət Mədəniyyət və İncəsənət Universitetində magistratura təhsili alıb. 2019-cu ilin “Nəsimi İli” çərçivəsində UNEC Yaradıcılıq Mərkəzi ilə birgə Türkiyənin Ankara şəhərində keçirilən tədbirdə Nəsiminin qəzəlləri üstündə muğam parçaları ifa edib. Yüksəksəviyyəli çıxışına görə Azərbaycanın Türkiyədəki səfirliyi tərəfindən təşəkkürnamə və üzərində Nəsiminin rəsmi olan bürünc xatirə pul nişanı ilə təltif olunub.

O, eyni zamanda, Gənclər və İdman Nazirliyi ilə Heydər Əliyev Mərkəzinin birgə layihəsi olan “Heydər Əliyev siyasi məktəbini öyrənirik-2020” Gənc Liderlər Proqramında fəallığı ilə seçilib. 2021-ci ilin oktyabrında isə Azərbaycan Respublikasının Gənclər Fondu, Naxçıvan Muxtar Respublikasının Gənclər Fondu və Türkiyə Gənclik Vəqfi (TÜGVA) tərəfindən təşkil olunan “Beynəlxalq Zəfər Düşərgəsi”ndə iştirak edib.

Hər səhnə mənim üçün öyrənmək və paylaşmaq deməkdir

Gənc muğam ifaçısı üçün istedadla zəhmətin birləşməsi uğurun açarı olub. 2022-ci ildə Yusif “İdeyanı Reallaşdır” Gənclərin Fərdi Layihələri üzrə Qrant müsabiqəsinin qalibi olub və Bakıda Xurşidbanu Natəvanın 190 illiyinə həsr edilmiş “Milli musiqi” müsabiqəsi layihəsini həyata keçirib.

Onun uğurları bununla bitmir: 2019-cu ildə Gənclər və İdman Nazirliyinin dəstəyi ilə keçirilən “Tələbə Baharı” XII Ümumrespublika yaradıcılıq festivalında “Muğam” nominasiyasında II yer, 2020-ci ildə isə XIII Ümumrespublika yaradıcılıq festivalında I yer qazanıb. Həmçinin 2022-ci ildə Türkiyənin İstanbul şəhərində Azərbaycan Respublikası Gənclər Fondu, TÜGVA və Pakistan Türkiyə Dostluq Dərnəyi tərəfindən təşkil olunan “Azərbaycan Türkiyə Pakistan Gənclərinin Birinci Həmrəylik Forumu”nda iştirak edib.

Bundan əlavə, 2025-ci ildə Qazaxıstanın Almatı şəhərində “Almatı: Türk dünyası gənclər paytaxtı” tədbirinin açılış mərasimində Azərbaycan milli musiqisini və muğamı nümayiş etdirərək ölkəmizi layiqincə təmsil edib.

Yusif Cəfərbəyli, bu il gənclər və idman naziri tərəfindən “İlin Gənci” mükafatına layiq görülüb.

Məqsədim muğamla insanların qəlbinə toxunmaqdır

“Gələcəkdə istəyirəm ki, hər ifamla dinləyicilərin qəlbində yeni hisslər oyansın, onlara Azərbaycan musiqisinin zənginliyini və dərin mənəvi dəyərini hiss etdirim. Muğam yalnız bir sənət kimi qalmasın, həm də xalqımızın tarixindən gələn duyğu və sevgini, milli kimliyimizi ifadə edən bir simvol olsun. Hər yeni gün, hər yeni layihə mənim üçün bir fürsətdir. Bu dəyərləri qorumaq, onlara həyat vermək və dinləyicilərin qəlbində əbədi iz buraxmaq üçün”, - deyə Yusif Cəfərbəyli əlavə edib.

Biz də gənc və istedadlı xanəndə Yusif Cəfərbəyliyə gələcək fəaliyyətində uğurlar, yaradıcılıq ilhamı və muğam sənətində yeni zirvələrə çatmağı arzulayırıq.