Martın 10-da AMEA-nın Botanika İnstitutunda Kənd Təsərrüfatında Özəl Bölmənin İnkişafına Yardım Agentliyi “Müsabiqəli qrantlar və elmi sistemin islahatı proqramı: nəticələr və perspektivlər” mövzusunda VI Milli seminar keçirmişdir.

Seminar iştirakçıları - əlaqədar nazirlik və komitələrin, AMEA-nın müvafiq institutlarının nümayəndələri, Kənd Təsərrüfatı Nazirliyi Aqrar Elm Mərkəzinin, onun elmi tədqiqat institutlarının, müsabiqəli qrantlar proqramı üzrə həyata keçirilən layihələrin rəhbərləri, fermerlər, əvvəlcə, ümummilli liderimiz Heydər Əliyevin xatirəsini bir dəqiqəlik sükutla yad etmişlər.

Agentliyin rəhbəri Vaqif Hüseynov Prezident Heydər Əliyevin təşəbbüsü ilə başlanmış aqrar islahatların uğurlu nəticələrindən, kənd təsərrüfatında üstün sahələrdən, “Azərbaycan Respublikasında sosial-iqtisadi inkişafın sürətləndirilməsi tədbirləri haqqında” Prezident Fərmanı, “Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)” ilə bağlı aqrar sahədə qarşıda duran vəzifələrdən danışmışdır.

Natiq Agentliyin həyata keçirdiyi layihələri xatırladaraq demişdir ki, bunların əhatə etdiyi rayonlarda yüksək məhsuldarlıq əldə olunmuşdur. İndi “Kənd icmalarının sərmayələşdirilməsi” layihəsi hazırlanır. Burada birbaşa kənd icmalarının və sosial infrastrukturun inkişafına yönəlmiş 400-450 mikrolayihənin qrantlar şəklində yerinə yetirilməsi nəzərdə tutulur. Layihədə qarşıya qoyulmuş vəzifələr adı çəkilən Dövlət Proqramının öncül istiqamətlərini tam əhatə edir. Bundan əlavə, şimal-şərq bölgəsinin inkişafına dair layihənin də hazırlanmasına başlanılmışdır.

Kənd Təsərrüfatı Tədqiqatları Şurası Katibliyinin rəhbəri Məmmədzadə Nəbiyev Müsabiqəli qrantlar proqramının həyata keçirilməsinin nəticələri, layihələrin təsiri, davamlılığı, tədqiqat sistemində islahatların əsas istiqamətləri, qarşıda duran vəzifələr haqqında məruzə etmişdir. O demişdir ki, akademik Cəlal Əliyevin rəhbərliyi ilə 2000-ci ildə bir model kimi yaradılmış Proqram bu gün milli aqrar elmə tam inteqrasiya olunmuş, onun ən aparıcı hissəsinə çevrilmişdir. İndiyədək Proqram çərçivəsində 43 layihə təsdiq edilmiş və maliyyələşdirilmişdir. Bu layihələr ölkənin 38 rayonunda 112 kəndi, 500-ə yaxın fermer təsərrüfatını əhatə edir. Təkcə ötən il 21 layihə təsdiq olunmuşdur. Onlara 70-dək müəssisə və təşkilat, 300-dən çox alim və mütəxəssis, 500-ə yaxın fermer cəlb edilmişdir. Layihələr taxılçılıqda gəlirlərin 3 dəfə, pambıqçılıq təsərrüfatlarında 2,5 dəfə, kartofçuluqda 2 dəfə artmasına səbəb olmuşdur. Məhsuldarlığın yüksəldilməsi ilə yanaşı, Proqram çərçivəsində akademik Cəlal Əliyevin tövsiyələri əsasında ölkənin qiymətli genofondunu təşkil edən və itməkdə olan bitkilərin qorunub saxlanması və artırılması təmin edilmişdir.

Seminarda müsabiqəli qrant layihələrinin informasiya sistemi haqqında məlumat verilmiş, Aqrar Elm Mərkəzinin direktoru Əsəd Musayev, Tərəvəzçilik İnstitutunun direktoru Fuad Məmmədov, Heyvandarlıq İnstitutunun direktoru Ağalar Mövsümov çıxış etmişlər.

Daha sonra seminar öz işini bölmə iclaslarında davam etdirmişdir.