NARIN-SIRDƏRYA SU ANBARLARINDA YARANMIŞ GƏRGİN VƏZİYYƏT MÜZAKİRƏ EDİLMİŞDİR

17.02.2004 [12:57]
Çap et
A⁺ A^-

AZƏRTAC-ın xüsusi müxbiri xəbər verir ki, Bişkekdə Qırğızıstan, Qazaxıstan, Tacikistan və Özbəkistan baş nazirlərinin müavinləri səviyyəsində keçirilən müşavirədə Narın-Sırdərya su anbarlarında yaranmış gərgin vəziyyət müzakirə olunmuşdur. Qırğızıstan baş nazirinin müavini Bazarbay Mambetov bildirmişdir ki, Narın-Sırdərya hövzəsinin bütün su anbarları dolduğu üçün vəziyyəti nəzarətdə saxlamaq çətinləşir. Nəticədə Qazaxıstandakı Çardar su anbarına normadan artıq su daxil olur.

Qazaxıstan baş nazirinin müavini Əhmədcan Esimovun fikrincə, yaxın vaxtlarda Çardar su anbarına axıdılan suyun həcmi azaldılmasa, Qazaxıstanın və Özbəkistanın böyük bir ərazisi su altında qala bilər.

Hər saniyədə anbara təxminən 1500 kubmetr su daxil olur, 800 kubmetr isə axıdılır.

Özbəkistan baş nazirinin müavini Umkir Sultanov isə ölkənin üç vilayətində gərgin vəziyyət yarandığını, suyun yaşayış məntəqələrinə yaxınlaşdığını və bunun qarşısının tezliklə alınmasının vacibliyini vurğulamışdır.

Müşavirədə gərgin vəziyyəti normallaşdırmaq üçün hər ölkənin üzərinə öhdəliklər götürməsinə dair protokol imzalanmışdır.