-Cənab Prezident!

Müstəqil dövlətimizin memarı və qurucusu, Azərbaycan xalqının ümummilli lideri Heydər Əliyevin müdrikliyi, uzaqgörənliyi və qətiyyəti hesabına təməli qoyulan və cənab Prezident hazırda, Sizin tərəfinizdən uğurla davam və inkişaf etdirilən strategiya nəticəsində Azərbaycan iqtisadi artım sürətinə görə dünyada lider ölkəyə çevrilmişdir.

Kompleks inkişaf proqramları və modern ideyalar əsasında iqtisadiyyatımız dünyada analoqu olmayan sürətlə inkişaf edir, qlobal miqyasda reallaşdırılan milli neft strategiyamız Azərbaycana hər mənada böyük uğurlar gətirir.

Xalqımızın firavan yaşamasına, ölkəmizin iqtisadi müstəqilliyinin möhkəmləndirilməsinə xidmət edən “Azərbaycan Respublikası regionlarının sosial-iqtisadi inkişafı Dövlət Proqramı”nın ardıcıl icrası davamlı iqtisadi inkişafı təmin etməklə, sosial sahədə qarşıda duran problemlərin həlli üçün etibarlı zəmin yaratmışdır. On altı ildən çox blokada şəraitində yaşayan Naxçıvan Muxtar Respublikasında inkişafın bütün göstəriciləri yüksələn xətlə davam etmişdir.

2004-cü illə müqayisədə 2007-ci ildə ümumi daxili məhsul 2,3 dəfə artaraq 545 milyon manata, sənaye məhsulları istehsalı 5 dəfə artaraq 123 milyon manata, kənd təsərrüfatı məhsulları istehsalı 1,6 dəfə artaraq 122 milyon manata, əsas kapitala yönəldilən investiyalar 3 dəfə artaraq 223 milyon manata, xarici ticarət dövriyyəsi 2,4 dəfə artaraq 92 milyon ABŞ dollarına, adambaşına düşən pul gəlirləri 2,3 dəfə artaraq 1314 manata, orta aylıq əmək haqqı 2,3 dəfə artaraq 154 manata çatmışdır.

Proqrama müvafiq olaraq 2004-2007-ci illərdə 89 istehsal, 894 yeni xidmət, təkcə 2007-ci ildə isə 32 istehsal, 22 xidmət obyekti istifadəyə verilmişdir. Həyata keçirilmiş tədbirlər nəticəsində muxtar respublikada yeni yaradılmış və fəaliyyəti bərpa olunmuş müəssisələrdə 192 növ üzrə 409 çeşiddə ərzaq və qeyri-ərzaq məhsulları istehsal olunur. 61 növdə ərzaq, 53 növdə qeyri-ərzaq, cəmi 114 növdə istehlak mallarına olan tələbat tamamilə yerli istehsal hesabına ödənilməkdədir. Muxtar respublikadan 34 növdə sənaye məhsulu ixrac olunur və ya satış üçün ölkəmizin digər bölgələrinə göndərilir.

İstehsal olunan bu məhsullar daxili bazarın tənzimlənməsi, süni qiymət artımının qarşısının alınması, istehlakçıların tələbatının fasiləsiz və daha dolğun ödənilməsi sahəsində xüsusi əhəmiyyət kəsb edir.

Proqramın qəbulundan sonra 3 mindən çox sosial infrastruktur obyektləri, o cümlədən 43 yeni orta məktəb binası, 51 səhiyyə obyekti, 24 mədəniyyət obyekti, 80 inzibati bina, Azərbaycan Vətən Müharibəsi iştirakçıları, əlil, qaçqın, məcburi köçkün və şəhid ailələri üçün 160 fərdi ev, 36 mənzilli yaşayış binası, 7 idman obyekti, 14 körpü, 11 nasos stansiyası və digər belə sosial infrastruktur obyektləri tikilmiş, 197 kilometr uzunluğunda yeni yollar çəkilmiş və ya əsaslı təmir edilmişdir.

Ötən dörd ildə muxtar respublikada 30639 yeni iş yeri açılmışdır ki, bunun da 19213-ü daimi iş yerləridir. Həmin müddətdə muxtar respublikanın qazlaşdırılmasına, Heydər Əliyev adına Su Anbarının, Şərur rayon idman mərkəzinin, muxtar məhkəmələrin inzibati binalarının, Arpaçay dəryaçasının tikintisinə 58,2 milyon manat subvensiya, sənaye, tikinti, nəqliyyat və rabitə sahəsinə isə dövlət büdcəsindən 92 milyon manat investisiya ayrılması, təbii qaza olan tələbatın ödənilməsinin təmin edilməsi məqsədi ilə tutumu 300 milyon kubmetr olan yeraltı qaz anbarının tikintisi, enerji təchizatının daha da yaxşılaşdırılması üçün qaz-mazut yanacağı ilə işləyən elektrik stansiyalarının və sosial əhəmiyyətli digər istehsal, xidmət və infrastruktur layihələrinin reallaşdırılması ilə bağlı qarşıya qoyduğunuz vəzifələr muxtar respublikanın əhalisi tərəfindən böyük sevinclə qarşılanır, insanların yaradıcılıq əzmini artırır.

Naxçıvan Muxtar Respublikası regional müstəvidə bir sıra mühüm göstəricilər üzrə - sənaye məhsulu istehsalının artım sürətinə, sənaye məhsulunun tərkibində qeyri-dövlət sektorunun xüsusi çəkisinə, hazır məhsul qalığının minimum həcminə, əsaslı kapitala yönəldilən investisiyanın adambaşına düşən həcminə, kənd təsərrüfatında inkişafın intensiv xarakterli olmasına, elektron tipli ATS-lərə qoşulmuş əsas telefon aparatlarının ümumi yekunda xüsusi çəkisinə, hər 100 ailəyə düşən telefon aparatlarının sayına, istehlak bazarında qiymətlərin sabitliyinə, yeni yaradılmış daimi iş yerlərinin xüsusi çəkisinə, orta aylıq əmək haqqının həcminə və 1 yaşa qədər ölən uşaqların və qeydə alınmış cinayət hadisələrinin sayının minimum həddə olmasına görə iqtisadi rayonlar arasında ilk yerdədir.

Ölkəmizdə, o cümlədən muxtar respublikada iqtisadiyyatın dinamik inkişafının mühüm amillərindən biri olan sahibkarlığın inkişafı üçün əlverişli sosial-iqtisadi və hüquqi mühit formalaşmışdır. Sahibkarlıq fəaliyyətinin stimullaşdırılması, Dövlət proqramında nəzərdə tutulmuş tədbirlərin icrası məqsədi ilə muxtar respublika sahibkarlarına son dörd ildə 20,7 milyon manat, kənd təsərrüfatı məhsulları istehsalçılarına təkcə 2007-ci ildə 4,7 milyon manat məbləğində dövlət maliyyə dəstəyi göstərilmişdir.

Muxtar respublikada ümumi daxili məhsulun 86 faizinin, sənayedə 69 faizinin, kənd təsərrüfatında 99 faizinin özəl bölmənin payına düşməsi, 15 mindən çox sahibkarlıq subyektində 80 mindən çox iş yerinin mövcud olması bu sahəyə göstərilən dövlət qayğısının nəticəsidir.

Proqramın icrası ilə əlaqədar Naxçıvan Muxtar Respublikasına səfərləriniz zamanı buradakı inkişafı yüksək qiymətləndirərək demişdiniz: “Naxçıvanda çox böyük quruculuq işləri aparılır. Burada gedən quruculuq-abadlıq işləri, yeniləşmə, infrastruktur layihələri - bütün bunlar məni sevindirir. Bütün bunlar göstərir ki, Azərbaycanın qədim torpağı olan Naxçıvan çox sürətlə inkişaf edir və naxçıvanlılar ölkəmizin hərtərəfli inkişafına öz töhfələrini verirlər”. Verdiyiniz bu yüksək qiymət muxtar respublika əhalisinin böyük sevincinə səbəb olmuş, qurub-yaratmaq əzmini daha da yüksəltmişdir.

Çoxəsrlik zəngin tarixinin şərəfli səhifələrindən birinə çevrilən ötən illərin uğurları göstərir ki, Azərbaycanın Naxçıvan iqtisadi regionu inkişaf və quruculuq yolu ilə irəliləyir. Bu, yeni iqtisadi təfəkkürə söykənən, bazar iqtisadiyyatı tələblərinə uyğunlaşan iqtisadi strategiyanın təzahürləridir. Bu inkişaf ulu öndərimizin adı ilə bağlıdır, bu kursun reallıqlarının və onun Sizin rəhbərliyinizlə uğurlu davamının təntənəsidir.

Cənab Prezident, Sizə öz minnətdarlığımızı bildiririk.

Sağ olun!