Naxçıvan, 14 may, AZƏRTAC

Naxçıvan Muxtar Respublikasının paytaxtı Naxçıvan şəhəri müasir şəhərsalma prinsipləri əsasında qurulur. İstifadəyə verilən sosial obyektlər, inzibati və ictimai yaşayış binaları şəhərin memarlıq quruluşuna yeni görkəm verir. Artıq qədim və müasir memarlıq elementlərinin sintezi əsasında aparılan kompleks quruculuq işləri şəhərin görkəmini tamamilə dəyişib. Bu işlər çərçivəsində insanların rahat mənzillərdə yaşaması, xüsusilə gənc ailələrin mənzil təminatı məsələsi xüsusilə diqqətdə saxlanılır, müasir yaşayış binaları tikilərək istifadəyə verilir.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, mayın 14-də Naxçıvan şəhərinin İstiqlal küçəsində inşa olunan 95 nömrəli yeni ictimai yaşayış binası istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov binanın açılışını bildirən lenti kəsib.

Tədbirdə Naxçıvan Şəhər İcra Hakimiyyətinin başçısı Vüqar Səfərov çıxış edərək deyib ki, Naxçıvan şəhərində infrastrukturun digər sahələri ilə yanaşı, mənzil tikinti sektoru da günbəgün inkişaf etdirilir, sakinlərin mənzil-məişət şəraiti yaxşılaşdırılır. Son illər aparılan genişmiqyaslı quruculuq işləri nəticəsində Naxçıvan şəhərində yeni yaşayış kompleksləri salınıb, müasir yaşayış binaları tikilib, mövcud yaşayış binaları əsaslı şəkildə yenidən qurulubdur.

Sakin Azad Əliyev deyib ki, Naxçıvan şəhərində müasir yaşayış binasının istifadəyə verilməsi gənclər tərəfindən razılıqla qarşılanır. Bu gün yeni binada mənzil sahibi olan hər bir ailə sevinc içərisindədir. Çünki gənc ailələrin mənzil sahibi olması onların sosial problemlərinin həlli istiqamətində atılan ən mühüm addımdır. Azad Əliyev göstərilən qayğıya görə gənc ailələr adından minnətdarlıq edib.

Naxçıvan Muxtar Respublikası Ali Məclisinin Sədri Vasif Talıbov tədbirdə çıxış edərək deyib: Bu gün yeni mənzil sahibi olanların həyatında əlamətdar gündür. Çünki mənzil hər bir insan həyatında və onun rahatlığının təmin olunmasında başlıca amildir. Müasir dizayna və bütün kommunal şəraitə malik olan yeni yaşayış binasının istifadəyə verilməsi də məhz bu məqsədə xidmət edir.

Ali Məclisin Sədri deyib: Gənclər hər bir ölkənin gələcəyidir. Ona görə də ölkəmizdə dövlət gənclər siyasəti uğurla həyata keçirilir, gənclərin sosial problemlərinin həlli və məşğulluqlarının təmin olunması diqqət mərkəzində saxlanılır. Bu yolun əsası ümummilli liderimiz Heydər Əliyevin ölkəmizə rəhbərliyi dövründə qoyulmuş və zaman keçdikcə öz bəhrəsini vermişdir. Ötən əsrin 70-ci illərində Ulu Öndərin ölkəmizdə həyata keçirdiyi tədbirlər nəticəsində yetişən gənc nəsil artıq 90-cı illərdə müstəqil Azərbaycanın həyatında fəal iştirakçılara çevrildilər. Müstəqillik dövründə yetişən gənclik isə ölkəmizin gələcəyinin möhkəmlənməsində iştirak edəcək. Bu mənada gənc nəsil üçün yaradılan şərait, gənclərə göstərilən qayğı ölkəmizin gələcəyinə göstərilən qayğıdır.

Ali Məclisin Sədri deyib: Dövlət vəsaiti hesabına tikilən yaşayış binasındakı mənzillərin ipoteka kreditindən istifadə edilməklə gənc ailələrə verilməsi ölkəmizdə gənclər siyasətinin daha bir ifadəsidir. Gənclərin mənzil-məişət şəraitinin yaxşılaşdırılması istiqamətində həyata keçirilən tədbirlər bundan sonra da davam etdiriləcəkdir. Bu gün ölkəmizdə, eləcə də muxtar respublikada gənclərə göstərilən qayğı onların mənzil şəraitinin yaxşılaşdırılması ilə məhdudlaşmır. Eyni zamanda, gənclərin hərtərəfli təhsil alması, hüquqlarının qorunması, işlə təmin olunması, ən əsası isə sabitlik şəraitində yaşamaları istiqamətində də ardıcıl tədbirlər görülür, ölkəmizin gələcəyinin təminatçıları olan layiqli vətəndaşlar yetişdirilir.

Ali Məclisin Sədri gəncləri yeni mənzil sahibi olmaları münasibətilə təbrik edib, binada yaradılan şəraitlə tanış olubdur.

Məlumat verilib ki, 1 girişi olan bina zirzəmi ilə birlikdə 8 mərtəbədən ibarətdir. Binada 6-sı birotaqlı, 12-si ikiotaqlı, 12-si isə üçotaqlı olmaqla, 30 mənzil vardır. Birotaqlı mənzillərin sahəsi 36, ikiotaqlı mənzillərin sahəsi 69, üçotaqlı mənzillərin sahəsi isə 78 kvadratmetrdir. Mənzillər müasir kommunal şəraitlə təmin olunub, daimi su xətti və optik kabel çəkilib, mərkəzi antena sistemi yaradılıb.

Binada lift quraşdırılıb, həyətdə əyləncə və istirahət guşələri istifadəyə verilib.

X X X

Naxçıvan şəhərinin İstiqlal küçəsindəki 87 və 91 nömrəli yaşayış binalarında yenidənqurma işləri aparılıb.

Həmin gün Ali Məclisin Sədri bu binalarda aparılan işlərlə maraqlanıb.

Məlumat verilib ki, hər iki bina 4 mərtəbədən ibarətdir. 87 nömrəli yaşayış binasında 34, 91 nömrəli binada isə 35 mənzil vardır. Əvvəllər bu yaşayış binalarında lazımi kommunal-məişət şəraiti yox idi. Yenidənqurma işləri zamanı binaların mühəndis-kommunikasiya sistemləri yenilənib, qapı və pəncərələri dəyişdirilib, dəhlizlər təmir olunub, mənzillərin sahəsi genişləndirilərək sakinlərin rahatlığı təmin edilibdir.

Hər iki binanın həyətində də abadlıq işləri aparılıb, yaşıllıqlar salınıb.

Ali Məclisin Sədri Naxçıvan şəhərindəki mövcud ictimai yaşayış binalarında yenidənqurma işlərinin davam etdirilməsi barədə tapşırıqlar verib.

Naxçıvan şəhərində Atıcılıq və əyləncə

mərkəzi fəaliyyətə başlayıb

Mayın 14-də Naxçıvan şəhərində Naxçıvan Muxtar Respublikası Atıcılıq Federasiyasının Atıcılıq və əyləncə mərkəzi istifadəyə verilib.

Naxçıvan Muxtar Respublikası Ali Məclisinin Sədri Vasif Talıbov açılış tədbirində iştirak edib.

Naxçıvan Muxtar Respublikası Atıcılıq Federasiyasının sədri Asəf Məmmədov çıxış edərək deyib ki, muxtar respublikada gənclərin atıcılıq idman növünə marağının artırılması istiqamətində kompleks tədbirlər həyata keçirilir. Naxçıvan Muxtar Respublikası Atıcılıq Federasiyasının fəaliyyətinin gücləndirilməsi, yeni atıcılıq mərkəzlərinin və klublarının istifadəyə verilməsi bu sahədə görülən işlərin miqyasını xeyli genişləndirib. Bu gün istifadəyə verilən Atıcılıq və əyləncə mərkəzi də gənclərin atıcılıq idman növlərinə marağının artırılmasında və asudə vaxtlarının səmərəli təşkilində mühüm rol oynayacaqdır. Asəf Məmmədov yaradılan şəraitə görə idmançılar adından minnətdarlıq edib.

Naxçıvan Muxtar Respublikası Ali Məclisinin Sədri Vasif Talıbov Atıcılıq və əyləncə mərkəzinin istifadəyə verilməsi münasibətilə tədbir iştirakçılarını təbrik edərək deyib: Atıcılıq mərkəzlərinin yaradılması ölkəmizdə gənclərin asudə vaxtının səmərəli təşkili ilə yanaşı, həm də onların orduya hazırlanması baxımından mühüm əhəmiyyət daşıyır. Muxtar respublikada Atıcılıq Federasiyasının fəaliyyət göstərməsi bu cür mərkəzlərin yaradılmasına imkan verir. Bu gün ilk belə mərkəz Naxçıvan şəhərində istifadəyə verilir. Rayon mərkəzlərində də müasir atıcılıq və əyləncə mərkəzlərinin yaradılması nəzərdə tutulmuşdur.

Açılışı bildirən lent kəsildikdən sonra məlumat verilib ki, burada gənclərin asudə vaxtının təşkili və atıcılıq idman növü ilə məşğul olmaları üçün hərtərəfli şərait vardır. Mərkəz interaktiv atış təlim zalı, kafe və oyun salonundan ibarətdir. Oyun salonunda quraşdırılan 6 aparat vasitəsilə gənclər müxtəlif idman növləri ilə virtual məşğul ola biləcəklər. Bu da gənclərin istirahətinin səmərəli təşkili ilə yanaşı, həm də onların psixoloji hazırlıq səviyyələrinin yüksəldilməsi və əqli inkişafı baxımından əhəmiyyətlidir.

İnteraktiv atış təlim zalında ən müasir avadanlıqlar quraşdırılıb, 5 atış nöqtəsi yaradılıb. Pnevmatik tüfəng və tapançadan atəş açmaqla monitorda əks olunan hədəfləri dəqiq vurmaq mümkündür. Atış başa çatdıqdan dərhal sonra nəticələr monitorda əks olunur. Real görüntülər üzərində qurulan interaktiv təlim sistemi gənclərin atıcılıq idman növünə olan marağını daha artıracaq, bu sahədə peşəkar idmançıların yetişməsinə stimul verəcəkdir.