Naxçıvanda Beynəlxalq Muzeylər Günü qeyd olunmuşdur

18.05.2011 [15:18]
Çap et
A⁺ A^-

Naxçıvan, 18 may (AZƏRTAC). Naxçıvan Dövlət Tarix Muzeyində Beynəlxalq Muzeylər Günü münasibətilə tədbir keçirilmişdir.

Muzeyin direktoru, Naxçıvan Muxtar Respublikasının Əməkdar Mədəniyyət İşçisi, Beynəlxalq Muzeylər Şurasının üzvü Nizami Rəhimov demişdir ki, əgər 1997-ci ilədək Naxçıvan Muxtar Respublikasında cəmi 13 muzey fəaliyyət göstərirdisə, hazırda onların sayı 24-ə çatdırılmışdır. Təkcə Naxçıvan şəhərində 12 muzey fəaliyyət göstərir. Son illər ərzində Naxçıvan Dövlət Tarix Muzeyi, Şahbuz, Babək, Sədərək rayonlarında tarix-diyarşünaslıq muzeyləri, Cəlil Məmmədquluzadə adına Naxçıvan Muxtar Respublika Ədəbiyyat Muzeyi, Xalça Muzeyi yeni binalara köçürülmüşdür. 1996-cı ildən sonra Naxçıvan şəhərində Heydər Əliyev Muzeyi, Bəhruz Kəngərli Muzeyi, Cəlil Məmmədquluzadənin ev-muzeyi, Şərur rayonunun Cəlilkənd və Babək rayonunun Nehrəm kəndində Cəlil Məmmədquluzadənin xatirə muzeyləri, Ordubad rayonunda akademik Yusif Məmmədəliyevin və M.S.Ordubadinin ev-muzeyləri əsaslı təmir olunmuş, ekspozisiyaları yenidən qurulmuşdur. Ötən il bu sahədə xüsusilə uğurlu olmuşdur. Şahtaxtinskilər muzeyi, “Xan Sarayı” Dövlət Tarix-Memarlıq Muzeyi yaradılmış, Naxçıvan Dövlət Xalça Muzeyi və Sədərək Rayon Tarix-Diyarşünaslıq Muzeyi müasir üslubda inşa edilmiş binalara köçürülmüşdür. Bundan başqa, M.S.Ordubadinin Ev-Muzeyi bərpa və yenidənqurma işlərindən sonra istifadəyə verilmişdir. Muzeylərin inkişafı istiqamətində görülən işlər bu il də davam etdirilir. Ordubad Rayon Tarix-Diyarşünaslıq Muzeyinin yerləşdiyi “Qeysəriyyə” binasının bərpa olunaraq istifadəyə verilməsi buna əyani misaldır. Ötən il muzeylərə 5922-dən çox eksponat daxil olmuşdur. Hazırda muxtar respublikanın muzeylərində 107687-dən eksponat mühafizə olunur. Muzeylərimizdə 300-dən çox işçi çalışır. Son illər 10 nəfər muzey işçisi Azərbaycan Respublikasının və Naxçıvan Muxtar Respublikasının fəxri adlarına layiq görülmüşdür.

Çıxışlardan sonra muzeylərə həsr edilmiş sənədli film nümayiş etdirilmişdir.

######