NAXÇIVANDA MAVİ QAZ ŞÖLƏLƏNDİ
AZƏRTAC xəbər verir ki, Naxçıvan şəhərinin Nizami küçəsindəki 48 nömrəli binaya təbii qaz verilmişdir. Binanın sakinləri ölkəmizin blokadada olan bu bölgəsinə 14 illik fasilədən sonra təbii qazın verilməsinin ümummilli liderimiz Heydər Əliyevin adı ilə bağlı olduğunu, Azərbaycan Prezidenti İlham Əliyevin bu problemin həllini daim nəzarətdə saxladığını qeyd etmiş, bu qayğı və diqqətə görə ölkəmizin başçısına hədsiz minnətdarlıqlarını bildirmişlər.
Naxçıvan Muxtar Respublikası Ali Məclisinin sədri Vasif Talıbov demişdir ki, bu bölgəyə qaz çəkilişi ilə əlaqədar hazırlanmış proqrama uyğun olaraq, regionun digər yerlərində qazlaşdırma 2 il ərzində mərhələlərlə başa çatdırılacaqdır.
