Naxçıvanda “Özgə uşağı olmur” devizi altında uşaq və yeniyetmələr üçün festival təşkil olunub
Naxçıvan, 1 oktyabr, AZƏRTAC
“Yeni nəsil qızlar: təhsildə və həyatda uğura doğru” layihəsi “Azərbaycan Uşaqları” İctimai Birliyi (AUİB) tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin ayırdığı qrant vəsaiti hesabına icra olunur və layihənin yekun tədbiri Naxçıvan Muxtar Respublikasında təşkil edilib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın bölgə müxbirinə bildirilib ki, tədbirdə əvvəlcə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Ordubad Rayon Mədəniyyət Sarayında keçirilən “Özgə uşağı olmur” devizi altında uşaq və yeniyetmələr üçün festivalın açılış mərasimində çıxış edən layihənin rəhbəri, AUİB-in sədri Kəmalə Ağazadə qonaqlara layihə çərçivəsində icra edilən fəaliyyətlər haqqında məlumat verib.
O qeyd edib ki, 4 ay müddətində Bakıda yaşayan və xüsusi qayğıya ehtiyacı olan, potensial erkən nikah, məişət zorakılığına məruz, təhsildən kənar qalan və hazırda reabilitasiya keçən yeniyetmə qızlar, Naxçıvan Muxtar Respublikası ərazisində isə Naxçıvan Qızlar Liseyinin müdavimləri və eləcə də Ordubad şəhər tam orta internat məktəbinin qız şagirdləri arasında gənc qızların maarifləndirilməsi üçün motivasiya təlimləri və art-terapiya kursları baş tutub. Ötən müddət ərzində onlarda özünəinam və fərdi inkişafı təmin etməklə yeniyetmə qızların həyatda uğur qazanmasında təhsilin vacibliyini göstərən modeli özündə əks etdirən “7 uğurlu gözəl” adlı qısa videoçarxlar nümayiş etdirilib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək bildirib ki, bu gün sevindirici haldır ki, komitə ailə, qadın və uşaq məsələləri ilə bağlı qeyri-hökumət təşkilatları ilə birgə əməkdaşlıq edir. Layihəyə qoşulan qızlar, həmçinin lisey və internat məktəblərinin uşaqları birgə fikir mübadiləsi aparmaq imkanı qazanıblar ki, bu da olduqca müsbət haldır.
Komitə sədri vurğulayıb ki, ölkəmizdə uşaqların hüquqlarının qorunması məsələsində təhsil sistemi əsas prioritetlərdən biridir. Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi olaraq biz də öz fəaliyyətimizdə xüsusi qayğıya ehtiyacı olan uşaqların diqqətdə saxlanılmasına, təhsildən yayınanların isə yenidən məktəbə cəlb olunmasına xüsusi önəm veririk. Belə ki, may ayı ərzində 22 uşağın təhsilə cəlb olunması təmin edilib.
Ramilə Seyidova əlavə edib ki, qızlarımızın təhsilə və peşəyə yönləndirilməsi əsas hədəflərdəndir. Onun sözlərinə görə, Naxçıvanda erkən nikah hallarının minimuma endirilməsi istiqamətində də ardıcıl tədbirlər həyata keçirilir.
Festivalda çıxış edən Naxçıvan Muxtar Respublikası Ali Məclisinin deputatı Elmar Rzayev layihənin sosial vacibliyini və bu cür fəaliyyətlərin xüsusilə ölkəmizin regionlarında daha çox sayda təşkil olunmasını vurğulayıb.
Festival çərçivəsində layihəyə cəlb edilmiş benefisiarların əl işlərindən ibarət sərgi nümayiş etdirilib, qonaqlar “7 uğurlu gözəl” videoçarxlarını izləyib, eləcə də istedadlı yeniyetmələrin mahnı və rəqsləri, şerləri səsləndirilib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən “Azərbaycan Uşaqları” İctimai Birliyinin iştirakçılarına hədiyyələr təqdim edilib.
Qeyd edək ki, tədbir Naxçıvan Muxtar Respublikası Təhsil Nazirliyi, Ailə, Qadın və Uşaq Problemləri üzrə Dövlət Komitəsinin tərəfdaşlığı, Ordubad Rayon İcra Hakimiyyəti və Naxçıvan Muxtar Respublikası Mədəniyyət Nazirliyinin dəstəyi ilə həyata keçirilib.
Bölmənin digər xəbərləri
