Nazir müavini: "Əmək pensiyaları haqqında" Qanuna ediləcək dəyişikliklər kifayət qədər balanslıdır
Bakı, 26 dekabr, AZƏRTAC
Dövlətimizin başçısının sosial sahəyə göstərdiyi qayğını, eyni zamanda, sosialyönümlü dövlət konsepsiyasını rəhbər tutaraq vətəndaşlara, pensiyaçılara yönəlik müsbət bir addım atılır. Pensiyaçılara artıq ödənilmiş pensiyaların məbləği yalnız son üç ildə ödənilmiş məbləğlə məhdudlaşacaq. Bu da birbaşa pensiyaçıların sosial rifahının müdafiəsinə xidmət edəcək.
AZƏRTAC xəbər verir ki bu sözləri əmək və əhalinin sosial müdafiəsi nazirinin müavini Anar Əliyev Milli Məclisin dekabrın 26-da keçirilən iclasında "Əmək pensiyaları haqqında" Qanunda dəyişiklik edilməsi barədə qanun layihəsinin ikinci oxunuşda müzakirəsi zamanı deyib.
Nazir müavini bildirib ki, "Əmək pensiyaları haqqında" Qanunun bir sıra sosialyönümlü yanaşmaları var. Bu yanaşmalar həm də, pensiyaçılara müəyyən səbəblərdən artıq ödənilmiş pensiyaların məbləğinin qaytarılmasında da öz əksini tapır.
Qanunun 39-cu maddəsində birbaşa göstərilir ki, artıq ödənilmiş pensiyanın məbləği əmək pensiyaçısının razılığı ilə, bu razılıq olmadığı halda isə bilavasitə yalnız məhkəmə qərarı əsasında həyata keçirilə bilər. Eyni zamanda, vəzifəli şəxslərin məsuliyyəti də çox geniş şəkildə həm Cinayət və İnzibati xətalar məcəllələrində, İnzibati icraat haqqında qanunvericilikdə öz əksini tapıb. "Əmək pensiyaları haqqında" Qanuna ediləcək dəyişikliklər kifayət qədər balanslı bir yanaşmadır, ədalətli, birbaşa vətəndaşa yönəlmiş bir yanaşmadır.
Bölmənin digər xəbərləri
