Nazirlik: Valideyn və şagirdlər tərəfindən müəllimlərə hədiyyələrin verilməsi yolverilməzdir
Bakı, 3 oktyabr, AZƏRTAC
Beynəlxalq Müəllimlər Günü münasibətilə valideyn və şagirdlər tərəfindən müəllimlərə hər hansı formada hədiyyələrin verilməsi və ya vəsait toplanması yolverilməzdir.
AZƏRTAC xəbər verir ki, bu barədə Elm və Təhsil Nazirliyindən bildirilib. Qeyd olunub ki, bu kimi hallarla rastlaşdıqda nazirliyin “Qaynar xətt” xidmətinə (146) anonim olmadan məlumat verməyinizi xahiş edirik. Bununla əlaqədar Bakı Şəhəri üzrə Təhsil İdarəsi və regional təhsil idarələrinə tapşırıqlar verilib. Məsələ ilə bağlı müvafiq monitorinqlər aparılacaq.
Nazirlik, həmçinin qarşıdan gələn 5 Oktyabr - Beynəlxalq Müəllimlər Günü münasibətilə müəllimləri təbrik edib, onlara peşə fəaliyyətlərində uğurlar arzulayıb. Valideynlərə müraciətlə bildirilib ki, təhsil ictimaiyyətinin başlatdığı #MənimMüəllimim çağırışına qoşularaq müəllimlərə xoş söz, təbrik mesajlarının çatdırılması onlar üçün ən böyük hədiyyədir.
Bölmənin digər xəbərləri
