NDU-da akademik nailiyyətləri yüksək olan tələbələrə “TələbəPlus” kartları təqdim edilib
Naxçıvan, 21 fevral, AZƏRTAC
Naxçıvan Dövlət Universitetində ilk dəfə olaraq tələbələrə “TələbəPlus” kartları təqdim olunub.
Universitetin Media və ictimaiyyətlə əlaqələr şöbəsindən AZƏRTAC-ın bölgə müxbirinə bildirilib ki, Magistratura və Doktorantura Mərkəzində keçirilən tədbirdə universitet rəhbərliyi, müəllim heyəti və tələbələr iştirak ediblər.
NDU-nun rektoru Elbrus İsayev rəqəmsallaşmanın ali təhsildəki əhəmiyyətindən danışıb, müasir texnologiyaların tədris prosesinə inteqrasiyasının vacibliyini vurğulayıb. Universitetin innovativ həlləri tətbiq edərək, tələbələrin akademik və sosial həyatını daha rahat və effektiv təşkil etməyə çalışdığını bildirib. Rektor diqqətə çatdırıb ki, bu istiqamətdə həyata keçirilən ən son təşəbbüslərdən biri də “TələbəPlus” kartıdır. Yaxın gələcəkdə universitetdə FaceID sistemi tətbiq ediləcək və tələbələr bu kart vasitəsilə fakültələrinə daxil ola biləcəklər. Elbrus İsayev bu yeniliyin həm təhlükəsizlik sisteminin gücləndirilməsinə, həm də giriş-çıxış prosesinin daha səmərəli idarə olunmasına imkan yaradacağını deyib.
İqtisadi məsələlər üzrə rektor müşaviri Ülvi Baxışlı “TələbəPlus” layihəsinin üstünlüklərindən danışıb. Layihə Təhsilin İnkişafı Fondu, Kapital Bank və “Visa”nın dəstəyi ilə reallaşdırılıb və tələbələrə bir çox imtiyazlar qazandırır. Rektor müşaviri bildirib ki, layihə çərçivəsində kart sahibləri təhsil, səhiyyə, mədəniyyət, nəqliyyat və digər sahələrdə müxtəlif güzəştlərdən yararlana biləcəklər. Bununla bağlı bir sıra tərəfdaş qurumlarla danışıqlar aparılıb. Xüsusilə, “Naxçıvan Dövlət Universiteti Xəstəxanası” publik hüquqi şəxs və “CinemaPlus” ilə əldə olunan razılaşmalar nəticəsində tələbələr bu kart vasitəsilə həmin müəssisələrin xidmətlərindən endirimli şərtlərlə istifadə imkanı qazanacaqlar.
Sonda rektor akademik nailiyyətləri yüksək olan tələbələrə “TələbəPlus” kartları və hədiyyələr təqdim edib.
Bölmənin digər xəbərləri
