NƏBATAT BAĞI ƏVVƏLKİ ŞÖHRƏTİNİ QAYTARMALIDIR
Nəbatat bağının direktoru biologiya elmləri doktoru Oruc İbadlı AZƏRTAC-ın müxbiri ilə söhbətində başçılıq etdiyi bu böyük təsərrüfat haqqında danışmışdır.
- Bağ 70 il əvvəl yaradılmışdır. Ancaq bu illər ərzində heç bir təmir işləri aparılmadığına görə əvvəlki görkəmini itirmişdir. Büdcə təşkilatı olan Elmlər Akademiyası bizə kömək göstərsə də, bu, kifayət deyildir. Doğrudur, kökü kəsilən və baxımsız qalmış bir çox bitkiləri akademik Cəlal Əliyevin köməyi sayəsində dirçəltmək mümkün olmuşdur. Hazırda həmin bitkilərlə bağlı elmi tədqiqatlarla məşğuluq.
Biz müxtəlif şitilliklərin yaradılması istiqamətində də iş aparırıq. Nəbatat bağına indiyədək rəhbərlik etmiş 7 direktorun hər biri onun inkişafı üçün xeyli iş görmüşdür. Professor Üzeyir Ağamirovun bağa rəhbərlik etdiyi 1960-1970-ci illər bu təbiət guşəsinin ən gözəl dövrü idi. SSRİ-nin süqutundan sonrakı illər bağ üçün əsil sınaq dövrünə çevrilmiş, elmi tədqiqat işləri dayandırılmışdı. Yalnız bir neçə il əvvəl müəyyən irəliləyiş nəzərə çarpmağa başlamışdır. 2000-ci ildə bağ Nəbatat İnstitutu statusu almış, gənc kadrlar işə götürülmüşdür.
Başlıcası isə budur ki, ABŞ, Kanada, İngiltərə, Çin, Yaponiya, Türkiyə və İran nəbatatçıları ilə toxum və ting mübadiləsi aparmaq imkanı əldə etmişik. Azərbaycan bitkilərinin xüsusi kataloqu buraxılmışdır. Qırmızı kitaba daxil edilmiş çiyələk ağacı, bataqlıq sərvi, maqnoliya, dəmirağac, Lənkəran akasiyası, habelə mütəlif zanbaq növləri bizim fəxrimizdir. Əminəm ki, Nəbatat bağının əvvəlki şöhrəti özünə qaytarılacaqdır.
