“Neftçi İdman Klubu”nun atletləri güllə atıcılığı üzrə Bakı çempionatında uğurla çıxış ediblər
Bakı, 14 yanvar, AZƏRTAC
Güllə atıcılığı üzrə Bakı çempionatına yekun vurulub.
AZƏRTAC xəbər verir ki, Bakı Atıcılıq Mərkəzində keçirilən yarışda 4 klubdan 40-dək idmançı mübarizə aparıb.
“Neftçi İdman Klubu”nun güllə atıcıları çempionatda aşkar üstünlükləri ilə seçilib və yüksək nailiyyətlər qazanıblar.
Kişilər arasında təşkil olunan pnevmatik tapançadan 10 metr məsafəyə atəşaçma yarışlarında Ruslan Lunyov 578 xal toplayaraq qalib adını qazanıb. Rəsul Məmmədov isə ondan cəmi 3 xal az toplayıb və gümüş medalla kifayətlənib.
Klubun xanım idmançıları yarışdakı daha uğurlu çıxışları ilə yadda qalıblar. Belə ki, qadınların pnevmatik tapançadan 10 metr məsafəyə atəşaçma yarışlarında fəxri kürsünün bütün pillələrində klubun yetirmələri yer alıblar. Onlardan Nigar Nəsirova 377 xalla liderliyə yüksəlib. Zərifə Qasımova ikinci, Lalə Mirzəzadə isə üçüncü yeri tutub.
Bölmənin digər xəbərləri
