Niyazi adına Dövlət Simfonik Orkestrinin Ağdamda qastrol konserti olub VİDEO
Ağdam, 20 iyun, AZƏRTAC
Heydər Əliyev Sarayının Niyazi adına Dövlət Simfonik Orkestrinin Ağdam Muğam Mərkəzində qastrol konserti olub. Konsert Mədəniyyət Nazirliyinin təşəbbüsü və təşkilatçılığı ilə həyata keçirilən, ölkənin aparıcı bədii kollektivlərinin Bakı və regionları əhatə edən genişmiqyaslı mədəni qastrol proqramı çərçivəsində reallaşıb.
AZƏRTAC-ın bölgə müxbiri xəbər verir ki, konsertdə Xalq artisti Yalçın Adıgözəlovun dirijorluğu ilə orkestr tərəfindən Azərbaycan və xarici ölkə bəstəkarlarının əsərləri səsləndirilib. Proqramda Üzeyir Hacıbəylinin “Arazbarı”, Aqşin Əlizadənin “Cəngi”, Arif Məlikovun “Komdenin arzuları”, Vasif Adıgözəlovun “Prelüd №1”, “Qərənfil” və “Lay-lay”, Həsən Rzayevin “Çahargah” rapsodiyası, Qara Qarayevin “Yeddi gözəl” baletindən “Aişənin rəqsi” və “İldırımlı yollarda” baletindən “Ehtiraslı qızın rəqsi”, Asəf Zeynallının “Muğamsayağı”, Süleyman Ələsgərovun “Rapsodiya”, Fikrət Əmirovun “Məhəbbət rəqsi”, “Min bir gecə” baletindən fraqment, “Kor ərəbin mahnısı” və “Mən səni alaram”, Hacı Xanməmmədovun “Kamança və orkestr üçün konsert”indən II hissə, Frits Kreyslerin “Çin tamburini”, Astor Piatsollanın “Oblivion” əsərləri yer alıb. Konsert Vasif Adıgözəlovun “Qarabağ şikəstəsi” oratoriyası ilə yekunlaşıb.
Xatırladaq ki, aparıcı bədii kollektivlərin qastrol proqramı “Azərbaycan Mədəniyyəti – 2040” Konsepsiyası çərçivəsində müəyyən olunmuş prioritet istiqamətlərdən biri – mədəniyyətin regionlarda əlçatanlığının artırılması və ölkə üzrə vahid mədəni ekosistemin formalaşdırılması məqsədlərinə uyğun olaraq həyata keçirilir.
Müxbir – Tahir Ağaməmmədov
Bölmənin digər xəbərləri
