Nizami rayonunda 28 May - Respublika Günü qeyd edilib
Bakı, 26 may, AZƏRTAC
Mayın 26-da Bakının Nizami Rayon İcra Hakimiyyətində 28 May - Respublika Günü münasibətilə tədbir keçirilib.
AZƏRTAC xəbər verir ki, tədbirdə rayon icra hakimiyyətinin başçısı Tahir Budaqov Şərqdə ilk demokratik respublika olan Azərbaycan Xalq Cümhuriyyətinin fəaliyyətindən və XX əsrin axırlarında keçmiş SSRİ-nin süqutundan sonra ölkəmizin öz dövlət müstəqilliyini bərpa etməsindən danışıb. Vurğulanıb ki, müstəqilliyimizin əbədi və dönməz xarakter alması ulu öndər Heydər ƏIiyevin əvəzsiz xidmətidir. Bərpa edilən dövlət müstəqilliyimiz 97 il əvvəl qoyulan təməl üzərində təşəkkül tapıb.
Sonra Milli Məclisin deputatı Musa Quliyev “Şərqin ilk demokratik respublikası - Azərbaycan Xalq Cümhuriyyəti” mövzusunda məruzə ilə çıxış edib. Bildirilib ki, 1918-ci il mayın 28-də Müsəlman Şərqində demokratik və ümumbəşəri dəyərlərə söykənən ilk respublika - Azərbaycan Xalq Cümhuriyyəti (AXC) qurulub. Cəmi 23 ay ömür sürməsinə baxmayaraq, AXC çox şərəfli və mürəkkəb bir yol keçib. Tez süqut etsə də, onun kütlələrin şüurunda yaratdığı milli istiqlal ideyaları əbədiyaşar olub.
Vurğulanıb ki, bu gün Azərbaycanda gedən demokratik, hüquqi, dünyəvi dövlət quruculuğu prosesi, o cümlədən dinamik sosial-iqtisadi inkişaf əsası 97 il əvvəl qoyulmuş dövlət müstəqilliyinin bəhrəsidir. Ulu öndər Heydər Əliyevin siyasi kursunu uğurla davam etdirən Prezident İlham Əliyev tərəfindən həyata keçirilən inkişaf strategiyası Azərbaycanın müstəqilliyinin daha da möhkəmlənməsinə, dövlətimizin qüdrətinin artırılmasına xidmət edir.
Milli Məclisin deputatları Sədaqət Vəliyeva, Flora Qasımova və Rasim Musabəyov çıxış edərək bildiriblər ki, hər bir səhifəsi biz azərbaycanlılar üçün müqəddəs və doğma olan Azərbaycan Xalq Cümhuriyyətinin təşəkkülü XIX əsrin sonu XX əsrin əvvəllərində Azərbaycanda mövcud olmuş ictimai-siyasi, ədəbi, fəlsəfi fikrin məntiqi nəticəsi, tarixi zərurət idi. Həmin dövrdə Azərbaycanda geniş vüsət almış milli-demokratik hərəkatın başında duran insanların hər birinin adı Azərbaycanın dövlətçilik tarixinə qızıl hərflərlə yazılıb. Azərbaycan Xalq Cümhuriyyəti az bir vaxtda parlamenti, hökuməti, ordusu, gömrük və hüquq mühafizə orqanları olan, dövlət rəmzlərinə malik, vətəndaş hüquqlarını hər şeydən uca tutan demokratik, dünyəvi və unitar dövlətə çevrilib.
Vurğulanıb ki, Azərbaycan Xalq Cümhuriyyətinin hüquqi və mənəvi varisi olan Azərbaycan Respublikası 1918-1920-ci illərdə toplanmış böyük tarixi təcrübəyə söykənərək, demokratik dövlət quruculuğunu dönmədən həyata keçirir və inkişaf etdirir. Ulu öndər Heydər Əliyevin siyasi xəttinin layiqli davamçısı Prezident İlham Əliyevin rəhbərliyi altında bu gün Azərbaycanda həyatın bütün sahələrində gerçəkləşdirilən möhtəşəm islahatların bəhrələrini gördükcə tam əsasla demək olar ki, Azərbaycanın müstəqilliyi dönməz və əbədidir.
Tədbirdə rayonun sosial-iqtisadi, mədəni inkişafında, ictimai həyatında və digər sahələrdə yüksək nailiyyətlər qazanan şəxslər Nizami Rayon İcra Hakimiyyətinin Fəxri fərmanı ilə təltif olunub.
Həmçinin, Azərbaycan dövlətinin xilaskarı və banisi ulu öndər Heydər Əliyevin anadan olmasının 92-ci ildönümünə həsr olunan tədbirlərdə və Bakının rayonları arasında keçirilən Gül bayramı müsabiqəsində fərqlənənlərə, o cümlədən də, “Şahin” hərbi-idman oyunlarının respublika yarışında ikinci yerə layiq görülən rayonun 32 nömrəli məktəbinin iştirakçılarına qiymətli hədiyyələr təqdim edilib.
Bölmənin digər xəbərləri
