Norveç millisinin baş məşqçisi: Futbolçularımın oyunundan və matça yanaşmasından xeyli razı qaldım
Oslo, 2 sentyabr, AZƏRTAC
Bugünkü matçda əsas məsələ qələbə qazanmaq idi. Biz də buna nail olduq. Futbolçularımın oyunundan və matça yanaşmasından xeyli razı qaldım.
AZƏRTAC xəbər verir ki, bu sözləri futbol üzrə dünya çempionatının seçmə mərhələsi çərçivəsində Azərbaycan millisini 2:0 hesabı ilə məğlub edən Norveç yığmasının baş məşqçisi Lars Leqeberk sentyabrın 1-də təşkil olunan mətbuat konfransında deyib. Mütəxəssis bildirib ki, Azərbaycan ilə oyunda qazanılan 3 xal bizim üçün böyük əhəmiyyət kəsb edir. Biz neçə dəfə özümüz rəqibə qol vurma şansı yaratdıq. Qarşıdakı görüşlərdə belə səhvləri təkrarlamaq olmaz. Bununla belə, oyundan razıyam. Biz məqsədimizə nail olduq.
İsveçli baş məşqçi qol epizodlarından lazımınca yararlana bilməmələrindən narahatlığını ifadə edib. Onun fikrincə, bu hal Almaniya ilə qarşıdakı görüşdə komandaya problem yarada bilər. Müdafiə xəttindən razılıq ifadə edən təcrübəli baş məşqçi hücum xətti üzərində işləməyə zərurət olduğunu söyləyib.
Səxavət Quliyev
AZƏRTAC-ın müxbiri
Oslo
Bölmənin digər xəbərləri
