Norveçin “Morrow Batteries” şirkəti akkumulyator detalları istehsal edəcək
Bakı, 16 avqust, AZƏRTAC
Batareya detalları istehsal edəcək Norveçin “Morrow Batteries” şirkəti ölkənin cənub sahilində ilk zavodunu açıb. Avropada analoqu olmayan bu müəssisədə ilin sonunadək ilk partiya məhsulların təhvil verilməsi və istehsal həcminin mərhələli şəkildə artırılması planlaşdırılır.
AZƏRTAC şirkətin açıqlamasına istinadla xəbər verir ki, akkumulyator detallarının istehsalı təmiz enerjiyə çıxış əldə etmək və bu sahədən Çini uzaqlaşdırmaq istəyən avropalı istehlakçılar üçün mühüm əhəmiyyət kəsb edir. Bu səbəbdən Norveç yeni istehsal sahəsinə diqqəti artırır.
2020-ci ildə qurulan “Morrow Batteries” ilkin olaraq mövcud litium dəmir fosfat (LFP) batareya texnologiyasından istifadə edəcək. Şirkətin məlumatına görə, bu, Avropada bu tip akkumulyatorlar istehsal edən ilk istehsal müəssisəsidir.
Şirkətin baş direktoru Lars Kristian Baçer bildirib ki, ilin sonuna qədər akkumulyatorların satışına başlamaq nəzərdə tutulur.
Şirkət “Nordic Batteries” kompaniyası ilə 7 il ərzində xüsusi enerji saxlama həlləri hazırlayan 5,5 giqavat-saat (GWh) təchizat müqaviləsi bağlayıb.
Şirkətin baş direktoru əlavə edib ki, ilk aylar prosesin qaydaya qoyulması, keyfiyyətin yaxşılaşdırılması və akkumulyator elementlərinin stabil istehsalına nail olmaq üçün tədbirlər görüləcək.
“İki ildən sonra - istehsalın sabit olduğu vaxt hər hansı problem yaşamaqdansa, mən işə salınma prosesində problem yaşamağa üstünlük verərdim”, -deyə o bildirib.
Hər bir “Morrow” batareyasının gücü 340 Wh, çəkisi 2 kiloqram, zavodun illik istehsal gücü isə təxminən 3 milyon ədədə bərabər olacaq. Şirkətin baş əməliyyat direktoru Andreas Mayerin sözlərinə görə, bu, adətən 50 kilovat-saat akkumulyator tutumu olan 20 min kiçik elektrik avtomobilini gücləndirmək üçün kifayətdir.
Bununla belə, Baçerin qeyd etdiyi kimi, ilkin istehsal həcmləri çox kiçik olduğundan, avtomobil istehsalçıları ilə təchizat müqavilələri hələ müzakirə edilmir. O əlavə edib: “Akkumulyatorları avtomobil şirkətlərinə satmaq hüququnu əldə etmək üçün bizə illər lazım olacaq”.
Eyni zamanda, “Morrow Batteries” 2029-cu ilə qədər Arendalda hər birinin illik gücü 14 GWh olan daha üç sahə tikərək hasilatı tədricən genişləndirməyi planlaşdırır.
Şirkətin ilk investorları arasında yerli kommunal “A Energi”, mühəndislik şirkətləri ABB və “Siemens”, Danimarkanın PKA pensiya fondları və Norveçin dövlətə məxsus yaşıl investisiya şirkəti “Nysnoe” var.
Bölmənin digər xəbərləri
