“Novaya Fabrika zvyozd” layihəsində iştirak edən azərbaycanlı ifaçılar Rusiya tamaşaçılarını heyran ediblər
Bakı, 10 oktyabr, AZƏRTAC
Rusiyanın MUZ-TV telekanalının “Novaya Fabrika zvyozd” layihəsinin azərbaycanlı iştirakçısı Elman Zeynalov bu musiqi layihəsinin beşinci hesabat konqresində populyar müğənni, bakılı Timur Rodriqes ilə birgə çıxış edib.
AZƏRTAC bu barədə müğənninin Instagram sosial şəbəkəsindəki səhifəsinə istinadla xəbər verir. E.Zeynalov həmin səhifədə konsertdən çəkilmiş kadrları paylaşıb. Artistlər Rodriqesin məşhur “Za toboy” kompozisiyasını ifa ediblər.
“Novaya Fabrika zvyozd” layihəsinin rəhbərləri Elman Zeynalovun ifasını yüksək qiymətləndirib və onu layihə çərçivəsində keçirilən müsabiqənin ən yaxşı iştirakçılarından biri hesab ediblər. Tamaşaçılar azərbaycanlı artistlərin ifasını ayaq üstə alqışlayıblar.
Qeyd edək ki, bu layihədə Rusiyanın müxtəlif şəhərlərini təmsil edən, ifaçı olmaq arzusu ilə yaşayan 16 nəfər iştirak edir.
Rostov-Donda yaşayan 23 yaşlı Elman Zeynalov öz istedadına əmindir və qələbə qazanacağına inanır.
Xatırladaq ki, gənc ifaçıları dəstəkləmək üçün təsis edilmiş “Fabrika zvyozd” televiziya musiqi layihəsi 2002-ci ildən həyata keçirilir. Rusiya estradasının bir sıra ulduzları vaxtılə bu layihənin iştirakçısı olublar.
Bölmənin digər xəbərləri
