Oğuz, 25 yanvar, AZƏRTAC

Oğuz rayonunda ilk “Avtoklaster” layihəsinə başlanılır. Dövlət Məşğulluq Agentliyi rayonda özünüməşğulluq proqramı çərçivəsində klaster müəssisələrin təşkili ilə sakinlərin məşğulluğunu təmin edəcək. Proqram üzrə oxşar iqtisadi fəaliyyət növləri üzrə aktivlər verilmiş şəxslərin eyni məkanda birgə klaster müəssisə kimi fəaliyyəti təmin ediləcək.

AZƏRTAC-ın bölgə müxbiri Oğuzda icra olunacaq yeni layihənin məram və məqsədləri ilə maraqlanıb.

Son illər digər bölgələrdə olduğu kimi, Oğuz rayonunda da nəqliyyat vasitələrinin sayının bir neçə dəfə artması müşahidə edilir. Şübhəsiz, nəqliyyat vasitələrinin çoxluğu onların təmiri sahəsində çalışan ustalara da tələbatı artırıb. Hazırda isə rayonda sürücülərin başlıca qayğısı avtomobillərini təmir etdirmək üçün bir mərkəzin olmamasıdır. Məsələn, Şirvan kənd sakini Ələfsər Quliyev avtomobilini təmir etdirmək üçün rayonda müxtəlif istiqamətdə fəaliyyət göstərən ustalara müraciət etmək məcburiyyətində qalır. Ə.Quliyevin sözlərinə görə, onun kimi onlarla sürücü ucqar kəndlərdən şəhər mərkəzinə gələndə bir neçə ustaya müraciət edir. Bu isə onların həm vaxt, həm də yanacaq və maliyyə itkisinə səbəb olur.

Bu mənada Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi, rayon (şəhər) icra hakimiyyətləri və Azərbaycan Həmkarlar İttifaqları Konfederasiyası ilə birgə əməkdaşlıq çərçivəsində yeni “Avtoklaster” layihəsinə başlanılması gələcəkdə bu pərakəndəliyə son qoya bilər. Layihə çərçivəsində eyni və ya oxşar iqtisadi fəaliyyət sahələri üzrə özünüməşğulluq proqramına cəlb edilərək aktivlərlə təmin olunacaq şəxslərin eyni məkanda yerləşdirilməklə klaster müəssisə formasında birgə fəaliyyət göstərmələrinə imkan yaradılacaq.

Dövlət Məşğulluq Agentliyi Şəki-Zaqatala regional məşğulluq filialının Oğuz rayon xidmət şöbəsinin müdiri İlkin Süleymanov bildirir ki, rayonda özünüməşğulluq proqramına cəlb edilən bir qrup şəxsin əmək bazarının tələbi, iqtisadiyyatın prioritet sahələri nəzərə alınaraq “Avtodəmirçi xidmətləri-PDR batıqların bərpası”, “Avtorəngsaz”, “Avtoçilingər xidməti-Katalizatorların təmizlənməsi xidməti”, “Avtoelektrik - Kondisioner təmiri”, “Avtoyağlama xidməti”, “Avtorazval xidməti”, “Avtotəmizləmə xidməti”, “Özünüxidmət avtotəmizləmə xidməti”, “Avtodisk təmiri – Avtomobil şinlərinin bərpası” üzrə əmlaklarla təmin edilməsi və onların eyni məkanda birgə fəaliyyətinin təşkili nəzərdə tutulur.

“Layihəyə ilkin olaraq Oğuz rayonundan başlanılacaq. Rayonda özünüməşğulluq proqramına cəlb olunmuş bir qrup şəxsin əmək bazarının tələbi, iqtisadiyyatın prioritet sahələri nəzərə alınmaqla xidmət sahələri üzrə əmlaklarla təmin edilməsi, onların eyni məkanda birgə fəaliyyətinin təşkili nəzərdə tutulur”, - deyən xidmət şöbəsinin müdiri əlavə edib ki, layihənin ilkin mərhələsində 9 nəfərin işlə təmin olunması nəzərdə tutulur.

Müsahibimiz diqqətə çatdırıb ki, məqsəd özünüməşğulluq proqramının səmərəliliyini daha da yüksəltmək, proqramdan yararlanan şəxslərin biznes fəaliyyətlərinin rəqabətədavamlılığını təmin etmək və gəlirlərini artırmaqdır.

Layihə iştirakçılarının seçimi zamanı qeyd edilən sahələrdən biri üzrə təcrübəsi olan şəxslərə üstünlük veriləcək.