DÜNYA
OLİMPİADA GÜNLƏRİNDƏ 3500 DOPİNQ YOXLAMASI KEÇİRİLƏCƏK
AZƏRTAC-ın Rusiyanın “Novosti” agentliyindən aldığı xəbərdə deyilir ki, Afinada Olimpiadaların bütün tarixi ərzində ən sərt dopinq yoxlamaları olacaqdır. Avqustun 13-dən 29-dək Dünya Antidopinq Agentliyi 3500 dopinq testi keçirəcəkdir.
Yoxlamaların mənfi nəticələri 24 saat, müsbət nəticələri, yəni idmançının dopinq qəbul etdiyini təsdiqləyən nəticələr isə 36 saat ərzində açıqlanacaqdır. Dopinq yoxlamaları nəticələrinin kifayət qədər tez araşdırılması Afinada açılan çox müasir laboratoriya sayəsində mümkün olacaqdır.
Rusiya Olimpiya Komitəsinin antidopinq komissiyasının rəhbəri Nikolay Durmanov hesab edir ki, Oyunlarda dopinq qalmaqalı mütləq baş verəcəkdir. Çünki Afinada hər hansı idmançının dopinq qəbul edib-etmədiyini üzə çıxarmaq üçün son dərəcə həssas və ən müasir avadanlıqdan istifadə olunacaqdır. Belə avadanlıq dünyanın heç bir ölkəsində yoxdur.