OPEK NEFTİNİN QİYMƏTİ 28 DOLLARI KEÇMİŞDİR
AZƏRTAC xarici agentliklərə istinadla xəbər verir ki, OPEK neftinin qiyməti bir barrel üçün 28 dollardan yuxarı qalxaraq, ixracçı ölkələrin saxlamağa səy göstərdikləri 22-28 dollar həddini keçmişdir. Təşkilatın katibliyinin iyulun 14-də Vyanada yayılmış məlumatında deyilir ki, ötən cümə günü bir barrel neftin qiyməti 27,98 dollardan 28,14 dollara qalxmışdır. Ekspertlərin fikrincə, neftin qiyməti Meksika körfəzinin cənub hissəsində tüğyan edən “Klodet” tropik qasırğası ilə əlaqədar qalxmışdır. Bir çox şirkətlər dəniz şelfində neft və qaz çıxarılan platformaların heyətini təxliyə etdiklərini bildirmişlər. Bu arada, OPEK neftinin orta gündəlik qiyməti ötən həftə də artaraq, bir barrel üçün 27,26 dollara çatmışdır (bir həftə əvvəl 27,14 dollar idi). Nəticədə, iyulun 10-a olan məlumata görə, təşkilatın bir barrel neftinin qiyməti 28,04 dollar olmuşdur. Birinci rübdə bu göstərici 30,55 dollar təşkil edirdi.
Bölmənin digər xəbərləri
