Ötən gün paytaxtda havanın temperaturu iqlim normasından yuxarı olub
Bakı, 9 oktyabr, AZƏRTAC
Ekologiya və Təbii Sərvətlər Nazirliyinin Milli Hidrometeorologiya Xidmətinin oktyabrın 9-u saat 09:00-a olan məlumatına əsasən, ölkə ərazisində hava şəraiti əsasən yağmursuz keçib, cənub-qərb küləyi əsib, bəzi yerlərdə arabir güclənib.
Xidmətdən AZƏRTAC-a verilən məlumata görə, küləyin maksimal sürəti arabir Daşkəsəndə 23, Mingəçevirdə 20, Qobustanda 19, Gədəbəydə 16, Bakıda və Abşeron yarımadasında isə 22 metr/saniyəyədək güclənib. Neft Daşları meteoroloji stansiyasının məlumatına əsasən, Xəzər dənizində dalğanın hündürlüyü 2.8 metrə çatıb.
Oktyabrın 8-də Bakıda havanın temperaturu iqlim normasından 4° yuxarı olub. Maksimal temperatur Bakıda və Abşeron yarımadasında 28°-dək, Naxçıvan Muxtar Respublikasında 28°-dək, Aran rayonlarında 28°-dək, dağlıq rayonlarda 23°-dək isti olub.
Ölkə ərazisində müşahidə olunan qeyri-sabit, küləkli hava şəraiti oktyabrın 11-i gündüzədək davam edəcək.
Oktyabrın 9-u günün ikinci yarısından oktyabrın 11-i axşamadək bəzi yerlərdə arabir leysan xarakterli yağış yağacağı gözlənilir. Ayrı-ayrı yerlərdə yağıntıların intensiv olacağı, şimşək çaxacağı, dolu düşəcəyi, dağlıq ərazilərdə qar yağacağı proqnozlaşdırılır.
Bölmənin digər xəbərləri
