Özbək rektor: Heydər Əliyev irsi milli inkişafın strateji modelidir
Bakı, 8 may, AZƏRTAC
Azərbaycan və Özbəkistan arasında sosial, iqtisadi, mədəni və humanitar əlaqələrin təməli Azərbaycan xalqının Ümummilli Lideri Heydər Əliyev və Özbəkistanın birinci Prezidenti İslam Kərimovun səyləri nəticəsində qoyulub. Bu gün isə müasir Azərbaycan dövlətinin memarı Prezident İlham Əliyev və Yeni Özbəkistanın qurucusu kimi tanınan Prezident Şavkat Mirziyoyevin rəhbərliyi ilə həmin münasibətlər yeni və daha yüksək inkişaf mərhələsinə qədəm qoyub.
AZƏRTAC xəbər verir ki, bu fikirləri Özbəkistanın Səmərqənd Dövlət Xarici Dillər İnstitutunun rektoru Bahodir Xolikov Bakı Slavyan Universitetində (BSU) keçirilən “Yeni dövrün Azərbaycanı” XVII beynəlxalq elmi konfransında deyib.
O bildirib ki, Özbəkistanda Heydər Əliyev adı yalnız müasir Azərbaycan dövlətçiliyi ilə deyil, həm də güclü, suveren, elmə və mədəni köklərə söykənən dövlət modeli ilə assosiasiya olunur. Onun sözlərinə görə, Ulu Öndərin irsi milli inkişafın yalnız iqtisadi və siyasi islahatlarla deyil, təhsil, mədəniyyət, dil, insan kapitalı və strateji düşüncə vasitəsilə formalaşdığını aydın şəkildə göstərir: “Heydər Əliyev xalqın gücünün onun savadlı insanlarında, dilində, mədəniyyətində və intellektual potensialında olduğunu dərindən anlayırdı. Bu yanaşmanın universitetlər üçün xüsusi əhəmiyyət daşıdığını vurğulayan rektor bildirib ki, ali təhsil müəssisələri milli dəyərləri qorumaqla yanaşı, qlobal bilik və əməkdaşlığa da açıq olmalıdır.
Azərbaycan və Özbəkistanı ortaq tarix, mədəniyyət, dil və mənəvi dəyərlər birləşdirir. Bu əlaqələr Türk dünyası, İslam sivilizasiyası, Böyük İpək Yolu, ədəbiyyat, elm və diplomatiya ənənələrinə əsaslanır. Rektorun sözlərinə görə, iki ölkə arasında akademik əməkdaşlıq yalnız formal sazişlərlə məhdudlaşmamalı, birgə tədqiqatlar, tələbə mübadiləsi və ortaq təhsil layihələri əsasında strateji tərəfdaşlığa çevrilməlidir”, - deyə rektor qeyd edib.
Bahodir Xolikov vurğulayıb ki, müasir dövrdə xarici dil tədrisi artıq yalnız qrammatika və tərcümə ilə məhdudlaşmır, strateji əhəmiyyət daşıyan sahəyə çevrilib: “Bu gün dil diplomatiya, elm, texnologiya, iqtisadi inkişaf, akademik mobillik və mədəni əlaqələrin əsas vasitələrindən biridir. Onun fikrincə, dil təhsilinə investisiya yatıran dövlət, əslində, öz beynəlxalq nüfuzuna sərmayə qoyur.
Bakı Slavyan Universiteti və Səmərqənd Dövlət Xarici Dillər İnstitutu kimi ali təhsil müəssisələrinin ortaq missiyası yalnız dil öyrətmək deyil, həm də gələcəyin müəllimlərini, diplomatlarını, tərcüməçilərini, tədqiqatçılarını və mədəniyyət elçilərini yetişdirməkdir. O qeyd edib ki, müasir çoxdilli təhsil modeli dil bacarıqları ilə yanaşı, mədəniyyətlərarası düşüncə, rəqəmsal savadlılıq, akademik yazı və tədqiqat potensialını da özündə birləşdirməlidir”.
Bölmənin digər xəbərləri
