AZƏRTAC-ın İTAR-TASS agentliyindən aldığı xəbərə görə, Özbəkistan Elmlər Akademiyası Tarix İnstitutunun direktoru, elmlər doktoru Dilorom Alimova belə hesab edir ki, özbəklərin dövlətçiliyinin azı üç min illik tarixi var. O demişdir: ”Bu yaxınlarda çapdan çıxmış “Özbəkistan dövlətçiliyinin tarixi oçerkləri” və “Özbək xalqının formalaşması prosesi” kitabları özbək millətinin XIV əsrdə - Teymurləngin hakimiyyəti dövründə təşəkkül tapması barədə sovet alimlərinin fərziyyəsini təkzib etmişdir. Çindəki yeni yazılı mənbələrə, arxeoloji və etnoqrafik materiallara əsaslanan araşdırmalar göstərmişdir ki, dövlətçiliyimizin kökləri əsrlərin dərinliklərinə gedir. Məsələn, bu il Özbəkistanın cənub-şərqindəki Kərşi şəhərinin əsasının qoyulmasının 2700, gələn il isə Fərqanə vadisinin mərkəzindəki Margilan şəhərinin 2000 illiyi qeyd olunacaqdır.
Alimova etiraf edir ki, yeni tədqiqatlara Prezident İslam Kərimovun 1998-ci ilin iyununda tarixçi alimlərlə görüşü təkan vermişdir. Görüşdə özbək xalqının tarixinin və dövlətçiliyinin öyrənilməsinin aktual vəzifələri müəyyənləşdirilmişdir. Alimovanın fikrincə, Özbəkistanın dünya sivilizasiyasının ən qədim və zəngin mədəni mərkəzlərindən biri olması faktı artıq sübuta yetirilmişdir.
