Özbəkistanda Vətən müharibəsindən bəhs edən “44 gün” kitabının və klipin təqdimatı olub
Daşkənd, 9 noyabr, AZƏRTAC
Özbəkistandakı Heydər Əliyev adına Azərbaycan Mədəniyyət Mərkəzinin (AMM) təşəbbüsü ilə Əlişir Nəvai adına Özbəkistan Milli Kitabxanasında (ÖMK) Zəfər Günü qeyd olunub, tanınmış özbək şairəsi Xasiyyət Rüstəmin Vətən müharibəsindən bəhs edən “44 gün” kitabının və “Azərbaycan, Qarabağ, sülh və qələbə üçün oxu” klipinin təqdimatı keçirilib.
AZƏRTAC xəbər verir ki, tədbir Əlişir Nəvai adına Özbəkistan Milli Kitabxanasında hər il ənənəvi olaraq keçirilən “İnfolib” kitabxana-informasiya həftəsi çərçivəsində təşkil olunub.
Bayram tədbirində Özbəkistanın elm, mədəniyyət və incəsənət xadimləri, şair və yazıçılar, ali məktəblərin professor-müəllim heyəti, jurnalistlər iştirak ediblər.
Əvvəlcə kitab sərgisi keçirilib. Sərgidə Xasiyyət Rüstəmin “44 gün” kitabı, Azərbaycan guşəsində isə ulu öndər Heydər Əliyevin həyat və fəaliyyətindən, Prezident İlham Əliyevin rəhbərliyi ilə ölkəmizin iqtisadi inkişafından bəhs edən kitablar, “Qarabağ həqiqətləri” seriyasından Heydər Əliyev Fondu tərəfindən rus və ingilis dillərində çap edilən nəşrlər, Azərbaycana tarixi və mədəniyyətinə dair kitablar nümayiş olunub.
AMM-nin özbək dilində Azərbaycanın tarixi, dövlətçiliyi, mədəniyyəti, ədəbiyyatı ilə bağlı Daşkənddə çap etdirdiyi kitablar, habelə Qarabağ münaqişəsinə dair nəşrlər xüsusi maraq doğurub.
Tədbiri alim və tərcüməçi Babaxan Şərif açaraq iştirakçıları salamlayıb, Özbəkistan-Azərbaycan tarixi dostluğundan, eyni soykök, dil, din və mədəniyyət daşıyıcıları olan xalqlarımızın tarixi dostluğundan söhbət açıb. O, Azərbaycanın 44 günlük Vətən müharibəsində öz torpaqlarını Ermənistan işğalından azad etməsini tarixi hadisə adlandırıb və bu münasibətlə yazılmış “44 gün” kitabının əhəmiyyətindən danışıb.
AMM-nin direktoru Samir Abbasov Azərbaycanın Qələbəsi ilə başa çatan Vətən müharibəsi haqqında məlumat verib, Ali Baş Komandan İlham Əliyevin rəhbərliyi ilə ordumuzun qəhrəmanlığından söhbət açıb. O deyib ki, müharibə ilə bağlı ilk kitablardan birini tanınmış özbək şairə Xasiyyət Rüstəm qələmə alıb.
S.Abbasov bildirib ki, bu gün “44 gün” kitabından başqa “Azərbaycan, Qarabağ, sülh və qələbə üçün oxu” klipinin də təqdimatı keçirilir. Səkkiz ay müddətinə çəkilən bu klipdə professional müğənnilərlə birlikdə gənc sənətçilər də yer alıb. Klipin yaradılmasında əsas məqsəd Mərkəzi Asiya xalqlarının diqqətini Ermənistanın işğal etdiyi Azərbaycan ərazilərində törətdiyi vəhşiliklərə cəlb etmək, xalqlarımızın həmrəyliyini, Qarabağ həqiqətlərini musiqinin dili ilə hər kəsə çatdırmaqdan ibarətdir.
ÖMK-nın direktor müavini Nəsibə Xaydarova Azərbaycanla münasibətlərin xüsusi əhəmiyyət kəsb etdiyini söyləyib, ölkəmizi Zəfər Günü ilə bağlı təbrik edib. O, Azərbaycanla mədəni əlaqələr və tarixi dostluq barədə fikirlərini bölüşüb.
Sonra Özbəkistandakı Heydər Əliyev adına AMM-nin layihəsi ilə çəkilmiş “Azərbaycan, Qarabağ, sülh və qələbə üçün oxu” klipi təqdim olunub.
“Özbəkistan-Azərbaycan” Dostluq Cəmiyyətinin icraçı direktoru, professor Erkin Nuriddinov Qələbə münasibətilə Azərbaycan xalqını təbrik edib. O, Vətən müharibəsinin hər gününü diqqətlə izlədiyini bildirərək qeyd edib ki, bu Qələbə təkcə Azərbaycanın deyil, həm də Türk dünyasının qələbəsidir.
Professor, soydaşımız Almaz Məcidova, Özbəkistanın “Mədəniyyət və Mərifət” Mərkəzinin eksperti Cəmilə Şirmuxammedova, jurnalist Dildora Xasanova, hərbi ekspert Şakir Dolimov və başqaları çıxışlarında Azərbaycanın haqq işini dəstəklədiklərini bildiriblər. Onlar vurğulayıblar ki, 30 ildən sonra nəhayət ədalət zəfər çaldı, Azərbaycan öz torpaqlarını işğaldan azad etdi.
Sonra Vətən müharibəsi haqqında “44 gün” kitabının müəllifi özbək şairə Xasiyyət Rüstəm onlayn formada tədbirə qoşularaq qardaş Azərbaycan xalqının 44 gün ərzində öz torpaqları uğrunda apardığı ədalət müharibəsi, qazandığı Zəfər haqqında fikirlərini bölüşüb və ölkəmizi təbrik edib.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
