PARİSDƏ AŞPA-NIN MONİTORİNQ KOMİTƏSİNİN İCLASI KEÇİRİLMİŞDİR
Milli Məclisin deputatı Bəxtiyar Əliyev iclas barədə AZƏRTAC-ın müxbirinə müsahibəsində demişdir:
- Bir neçə ölkənin öhdəlikləri və monitorinqdən sonrakı dialoqun davam etdirilməsi barədə məsələlər iclasın əsas müzakirə obyekti olmuşdur. Gündəliyə Azərbaycanda keçirilmiş parlament seçkiləri ilə bağlı mətbuat xidmətinin məlumatı da çıxarılmışdı.
Latviya ilə bağlı məsələnin müzakirəsində Azərbaycan nümayəndə heyəti fəal iştirak etmiş, bu ölkədə monitorinqdən sonrakı dialoqun dayandırılması və Slovakiyada monitorinqin vəziyyətinə dair fikir mübadiləsində ölkəmizin mövqeyini bildirmişdir. Bu məsələlər komitənin dekabr ayında keçiriləcək növbəti yığıncağında yenidən baxıldıqdan sonra yanvar sessiyasının gündəliyinə çıxarılacaqdır.
Ölkəmizdə keçirilmiş parlament seçkiləri ilə bağlı Azərbaycan üzrə həmməruzəçilərdən Andreas Qross məlumat vermişdir. O, seçkiləri müşahidə etdiyini, bəzi məntəqələrdə pozuntulara yol verildiyini bildirmişdir.
Mərkəzi Seçki Komissiyasının seçkilərin nəticələrini araşdırdığını xatırladan A.Qross seçkidən sonrakı vəziyyəti öyrənmək məqsədi ilə ölkəmizə növbəti səfər etmək arzusunda olduğunu söyləmişdir.
Azərbaycan nümayəndə heyəti də müzakirə olunan məsələyə öz münasibətini bildirmişdir. Mən komitə üzvlərinə məlumat verərək bildirdim ki, Azərbaycanda seçkilər demokratik və şəffaf şəraitdə keçmişdir. Beynəlxalq müşahidəçilər məntəqələrin 50 faizində seçkilərin gedişini izləmiş və olduqları məntəqələrin 13 faizində pozuntu hallarını qeydə almışlar. Bununla bağlı namizədlərin və beynəlxalq müşahidəçilərin MSK-ya daxil olmuş şikayətlərinə çox diqqətlə baxılır. Ciddi pozuntular müşahidə edilmiş dairələrdə seçkilərin nəticələri ləğv edilmişdir və həmin dairələrdə təkrar seçkilər keçiriləcəkdir. Bəzi seçki dairələrində isə şübhə doğuran məntəqələrin nəticələri ləğv edildiyi üçün dairələr üzrə nəticələr dəyişdirilmişdir. Seçkilərlə bağlı bütün şikayətlərə həm MSK, həm də Respublika Prokurorluğu tərəfindən çox diqqətlə yanaşılır və ciddi araşdırmalar aparılır. Hətta pozuntulara yol verilmiş bəzi dairə komissiyalarının rəhbərləri cinayət məsuliyyətinə cəlb olunmuşlar.
Bir sözlə, Azərbaycan nümayəndə heyəti bir daha bildirmişdir ki, ölkəmizdə parlament seçkiləri beynəlxalq standartlara, ölkə Prezidentinin 11 may və 25 oktyabr tarixli Sərəncamlarının tələblərinə uyğun olaraq, demokratik və şəffaf şəkildə keçirilmişdir.
Ən mühüm cəhət budur ki, haradasa müəyyən qanun pozuntuları olmuşdursa, dövlət buna dərhal reaksiya vermiş və araşdırılmasına başlamışdır. Ölkə Prezidenti bu məsələlərə bilavasitə öz münasibətini bildirmiş və bir daha qeyd etmişdir ki, Azərbaycanda yalnız və yalnız demokratik seçkilər keçiriləcəkdir. Ona görə də bu seçkilərdə qanun pozuntularına yol verənlərə qarşı ciddi tədbirlər görüləcəkdir. Azərbaycan Prezidenti seçkilərə müdaxilə etdiyi üçün bəzi icra hakimiyyəti başçılarını tutduqları vəzifədən azad etmişdir.
Bütün bunlar sübut edir ki, Azərbaycan dövləti, Azərbaycan rəhbərliyi özünün siyasi iradəsini bir daha ortaya qoydu və göstərdi ki, Azərbaycan dövləti nəinki demokratik və şəffaf seçkilərin tərəfdarıdır, həm də onu layiqincə təşkil edib həyata keçirən bir ölkədir.
Bölmənin digər xəbərləri
