“Park Cinema”nın “Metro Park”da yerləşən ikinci meydançasında yeni qiymət tariflərinin tətbiqinə başlanılmışdır
Bakı, 16 noyabr (AZƏRTAC). Ölkənin ilk kinoteatrlar şəbəkəsi olan “Park Cinema” “Metro Park”da yerləşən ikinci meydançasında yeni qiymətlər tətbiq etmişdir.
“Park Cinema”dan AZƏRTAC-a bildirmişlər ki, yeni tariflər və tarif planları filmlərə daha çox tamaşaçı cəlb etmək məqsədi daşıyır. Böyüklər üçün bir biletin qiyməti 4 manat 80 qəpik təşkil edir. Həmçinin qiymətləri 3 manat 30 qəpikdən başlayan yeni “Uşaq”, “Ailə 3”, “Ailə 4” və “Super gün” kimi yeni tarif planları təklif olunur.
“Ailə 3” və “Ailə 4” paketləri əvvəlki tariflərlə müqayisədə kinoya ailəvi gedənlərin büdcəsinə 25 faiz qənaət etmək imkanı verir. Yeni “Uşaq” tarif planı sayəsində valideynlər kinoteatra uşaqları ilə birlikdə getdikdə onlara qiymətdə güzəşt ediləcəkdir. Yəni valideynlər də bileti uşaqlar üçün müəyyən olunmuş qiymətə ala biləcəklər. Çərşənbə axşamı - “Super gün” biletlərinin qiyməti hamı üçün 3 manat 30 qəpik (2D) və 4 manat 30 qəpik (3D) olacaqdır.
Qiymətlərin endirilməsi xəbərini məmnunluqla bölüşən “Park Cinema” şəbəkəsinin direktoru Namiq Quliyev demişdir: Bizim əsas iş prinsiplərimizdən biri şəhər sakinləri qarşısında daşıdığımız sosial məsuliyyətdir. Yeni tarif planlarının tətbiq olunmasının səbəblərindən biri də budur. Çevik tariflər sayəsində hər kəs özünə daha münasib qiymətlə bilet ala biləcəkdir.
Yeni tariflər “Park Cinema”nın şəhər həyatının ən populyar və inkişaf edən sahəsində növbəti innovasiyasıdır. Bu yenilik ölkənin kinoprokat sektoru tarixində ilk dəfədir ki, tətbiq olunur. Atılan addım kino mədəniyyətinin bərpasında və Azərbaycanda kino sektorunun inkişafında önəmli rol oynayacaqdır.
Qeyd edək ki, “Park Cinema”nın “Metro Park” kinoteatrı 2013-cü ilin aprelində açılmış və tamaşaçı yerlərinin sayına görə Cənubi Qafqazda ən böyük kinoteatrdır. Burada “Ad günün mübarək!” adlı daimi aksiya keçirilir. Aksiyanın şərtlərinə görə ölkənin hər vətəndaşı öz doğum günündə kinoya pulsuz baxa bilər.
Ölkədə ilk yeni nəsil kinoteatrlar şəbəkəsi olan “Park Cinema” 2010-cu il oktyabrın 16-dan fəaliyyətə başlamışdır. Hazırda şəbəkə 3 kinoteatra, 13 salona malikdir və eyni vaxtda 2200 tamaşaçıya xidmət göstərə bilir.
Şəbəkənin kinoteatrlarında ən son texnologiyalar tətbiq edilmiş və kinoproyeksiya sahəsində aparıcı brendlərin avadanlığı quraşdırılmışdır. Şəbəkə və repertuar haqqında ətraflı məlumatı www.parkcinema.az saytından və Facebook sosial şəbəkə səhifəsindən http://www.facebook.com/ParkCinema əldə etmək olar.
Bölmənin digər xəbərləri
