SİYASƏT
PARLAMENTLƏRİN QADIN DEPUTATLARININ REGİONAL KONFRANSI
Sentyabrın 24-də Bakı Əyləncə Mərkəzində “Sülh, inkişaf və bərabərlik naminə: XXI əsr - uşaqlara və qadınlara qarşı zorakılığın müxtəlif aspektləri, qlobal nəticələr” mövzusunda regional konfrans öz işinə başlamışdır. “Parlament və qadınlar” ictimai birliyi tərəfindən təşkil olunmuş tədbirdə Türkiyə, Gürcüstan və Azərbaycan parlamentlərinin qadın deputatları iştirak edirlər.
Prezidentin İcra Aparatının humanitar siyasət şöbəsinin müdiri Fatma Abdullazadə konfransı giriş sözü ilə açaraq, bu günlərdə təməli qoyulmuş və Gürcüstan, Türkiyə, Azərbaycan xalqlarının rifahının yaxşılaşmasına şərait yaradacaq Bakı-Tbilisi -Ceyhan əsas ixrac boru kəmərinin böyük əhəmiyyətini vurğuladı. O, Ermənistanın ölkəmizə təcavüzü nəticəsində qadınların və uşaqların düşdükləri məhrumiyyətlərdən ətraflı danışdı. F.Abdullazadə 1995-ci ildə Pekində keçirilmiş Qadınların vəziyyətinə dair dördüncü ümumdünya konfransında qəbul edilmiş fəaliyyət platforması əsasında proqramların işlənib həyata keçirilməsinin vacibliyini nəzərə çarpdıraraq dedi ki, başlıca vəzifə konkret tədqiqat proqramlarının köməyi ilə iqtisadi və siyasi həyatda qadınların rolunu artırmaq, onlara qarşı zorakırlığın kökünü kəsməkdir.
Sonra Milli Məclis sədrinin müavini Gövhər Baxşəliyeva ümumi iclasda çıxış edərək, qadınların və uşaqların hüquqlarının qorunması sahəsində qanunvericilik bazasının yaradılması məsələləri üzərində dayandı.
BMT-nin Azərbaycandakı rezident-əlaqələndiricisi Marko Borsotti konfrans iştirakçılarını salamlayaraq, tədbirin Birləşmiş Millətlər Təşkilatının dəstəyi ilə keçirildiyini bildirdi.
Ümumi iclasda Qadın Problemləri üzrə Dövlət Komitəsinin sədri Zəhra Quliyeva, Türkiyə nümayəndə heyətinin rəhbəri Hürriyyət Ərsoy, Gürcüstan nümayəndə heyətinin rəhbəri Nani Canişvili də çıxış etdilər.
Sentyabrın 25-də konfrans işini “Cəmiyyətdə qadınlara və uşaqlara qarşı zorakılıq”, “Silahlı münaqişələr, terrorizm və separatizm qadınlara və uşaqlara qarşı zorakılığın əsas amilidir”, “Münaqişələrin həllində qadınların rolu” mövzularında bölmə iclaslarında davam etdirəcəkdir.
Konfransın sonunda Türkiyə, Azərbaycan və Gürcüstan prezidentlərinə, BMT-nin baş katibinə və Avropa Şurası Parlament Assambleyasının sədrinə müraciət, habelə Bakı Bəyannaməsi qəbul olunacaqdır.
Bölmənin digər xəbərləri
