Politoloq: Azərbaycan daha ədalətli dünya nizamının yaradılmasına çağırış edir
Bakı, 13 yanvar, AZƏRTAC
Azərbaycan Respublikası Prezidenti yerli telekanallara müsahibəsi zamanı ölkəmizin daxili və xarici siyasətinə aid çox mühüm məsələlərə aydınlıq gətirərək, 2023-cü ildə dövlətimizin qarşıya qoyduğu məqsəd və vəzifələri müəyyənləşdirdi. Bununla yanaşı, Prezident, həmçinin beynəlxalq münasibətlər sistemi, dünya düzəni haqqında dövlətimizin baxışını diqqətə çatdırdı. “Vətən müharibəsi Azərbaycanı, Rusiya-Ukrayna müharibəsi isə dünyanı dəyişdi”, - deyən Prezident haqlı olaraq bu müharibədən sonra yeni düzənin yaradılmasının labüd olduğunu vurğuladı. Bütün ölkələr, eyni zamanda Azərbaycan üçün həyati əhəmiyyətə malik bir reallıqdır. Bu gün Azərbaycanı təhdid edən əsas təhlükəsizlik riskləri ölkəmizdən kənarda formalaşaraq regionda və dünyada gedən proseslərə paralel şəkildə inkişaf edir.
Bu fikirləri AZƏRTAC-a açıqlamasında Beynəlxalq Münasibətlərin Təhlili Mərkəzinin (BMTM) şöbə müdiri, politoloq Vasif Hüseynov söyləyib.
“Mövcud beynəlxalq reallıqlarda daha ədalətli nizamın qurulması, dövlətlərin beynəlxalq hüququn norma və prinsiplərinə əməl etməsi və qanunsuz iddialardan çəkinməsi tələb olunur. Bunun baş verməyəcəyi halda, daha böyük münaqişə və müharibələrin, iqtisadi böhranların və faciələrin qarşısını almaq mümkün olmayacaq. Prezident İlham Əliyev müsahibəsində bu kontekstdə atılması vacib olan bir neçə addımı qeyd etdi. O, haqlı olaraq “BMT Təhlükəsizlik Şurasının (TŞ) tərkibinə yenidən baxılmalıdır” tezisini səsləndirdi. Bu qurumda islahatların aparılması həqiqətən qaçılmaz bir ehtiyac halına gəlib. Azərbaycan ilə yanaşı, Türkiyə və bir çox başqa dövlətlər BMT TŞ-nin hazırkı strukturunun köhnəldiyini və dövrün tələblərinə cavab vermədiyini bildirir”, - deyə ekspert bildirib.
V.Hüseynov qeyd edib ki, bu institut İkinci Dünya müharibəsindən sonra formalaşıb. İndi faktiki olaraq Üçüncü Dünya müharibəsi gedir. BMT TŞ bu müharibənin və bir çox başqa münaqişələrin qarşısını almaqda və ya həllinə nail olmaqda aciz vəziyyətə düşüb. Prezident İlham Əliyev haqlı olaraq bildirdi ki, bu qurumda yeni üzvlər olmalıdır. Dünyanın nəhəng dövlətlərinin bir araya gəldiyi və heç bir müsəlman dövlətinin təmsil olunmadığı 5 daimi üzvlük sisteminə mütləq yenidən baxılmalıdır. Bu kontekstdə əminəm ki, dövlətimizin başçısı tərəfindən səsləndirilən İslam Əməkdaşlıq Təşkilatına və Qoşulmama Hərəkatına daimi üzv seçmək təklifi qlobal miqyasda müzakirə ediləcək.
“Bu, ona görə diqqətəlayiq təklifdir ki, bəzi böyük dövlətlər BMT TŞ-də islahatlardan öz dar maraqları üçün istifadə etməyə və özlərini 5 daimi üzvün sırasına daxil etməyə çalışır. Əlbəttə ki, bu, beynəlxalq təhlükəsizliyə fayda verməz. Ona görə daha fundamental dəyişikliklərə getmək, İkinci Dünya müharibəsindən sonra qurulmuş dünya düzənində səsləri daim boğulan və hüquqları tapdalanan müsəlman dövlətlərinə də TŞ-də təmsil olunmaq hüququ vermək dövrün tələbidir”, - deyə V.Hüseynov bildirib.
Bölmənin digər xəbərləri
