SİYASƏT
Politoloq: Azərbaycanın enerji resurslarına maraq əhəmiyyətli dərəcədə artıb
Bakı, 12 yanvar, AZƏRTAC
Prezident İlham Əliyevin yerli media nümayəndələrinə verdiyi son müsahibə siyasi, iqtisadi, sosial və hərbi məsələlərə dair münasibətlərə aydınlıq gətirdi. Dövlətimizin başçısının müsahibə və çıxışları ölkəmizdə rəğbətlə qarşılandığı kimi xaricdə də diqqətlə izlənilir. Çünki Azərbaycan Prezidentinin açıqlamaları dövlətimizin daxili və xarici siyasətini və qarşıda duran məsələləri əks etdirir. Keçən ilin nəticələrini yüksək qiymətləndirən Prezident həyata keçirilən və gələcəkdə reallaşdırılması nəzərdə tutulan böyük enerji və nəqliyyat - kommunikasiya layihələrindən də danışdı. Bilirik ki, ölkəmizin enerji siyasətinin əsası keçən əsrin sonlarında Ulu Öndər Heydər Əliyev tərəfindən qoyulmuş və bu günlərdə də Prezident İlham Əliyev tərəfindən uğurla həyata keçirilir. İndi bu siyasətin müsbət nəticələrindən bir çox ölkələr enerji təhlükəsizliyi ilə üzləşdiyi bu günlərdə çox etibarlı şəkildə faydalana bilirlər.
Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.
O qeyd edib ki, Prezident İlham Əliyev əsas problemimiz olan Ermənistan-Azərbaycan münasibətlərinin gedişinə dair də maraqlı fikirlər səsləndirib. Vətən müharibəsində əldə olunan nəticələrin rəsmiləşdirilməsi istiqamətində aparılan siyasətin, işğaldan azad olunmuş ərazilərimizdə bərpa-quruculuq işlərinin və əhalinin həmin ərazilərdə məskunlaşmasının davam edəcəyini bildirib. Azərbaycan dövlətinin qarşısına qoyduğu məqsədlərə çatdığını və bu istiqamətdə mütəmadi, provakasiyalara getmədən, dəqiq və real hədəflərə istiqamətlənmiş siyasət apardığını diqqətə çatdırıb. Buna görə də beynəlxalq ictimaiyyət tərəfindən də ciddi dövlət kimi qəbul olunduğunu bildirib.
“Azərbaycan ictimaiyyətinin Rusiya sülhməramlılarının müvəqqəti yerləşdiyi ərazilərdə baş verənlərə biganə qalmayacağı gözlənilən idi. Çünki bu xalq iki il bundan əvvəl “Dəmir yumruq” altında birləşərək, otuz ilə yaxın işğalda qalmış torpaqlarını qəhrəmancasına döyüşərək, canı və qanı bahasına, övladlarını şəhid verərək azad etdi. Əlbəttə, xalqın iradəsi ən böyük gücdür. Azərbaycan xalqı tarix boyu düşmənə, təhlükəyə qarşı birləşmiş, bundan sonra baş verənlərə də biganə qalmayacaqdı, dövlətin, xalqın mənafeyi naminə bir olaraq öz sözünü deyəcəkdi. Şuşa-Xankəndi yolunda davam edən etirazlar da iki ildir rus-erməni qanunsuzluqlarına qarşı xalq iradəsinin nümunəsidir. Prezident ekofəalların etirazlarına münasibət bildirərək deyib: “O gənclərə “Eşq olsun!” demək istəyirəm, onlar bizim fəxrimizdir. Qeyd etdiyiniz kimi, gecə-gündüz şaxtalı-qarlı havada oradadırlar, öz haqlarını tələb edirlər və bir daha Azərbaycan gəncinin nə qədər yüksək keyfiyyətlərə malik olmasını bütün dünyaya göstərirlər”.
Dövlətimizin başçısı 2023-cü il üçün də nikbin olduğunu, qarşıya qoyulan sosial-iqtisadi, hərbi və siyasi məqsədlərə çatdırılacağını, bütün bunların da ölkəmizin geosiyasi imkanlarını daha da genişləndirəcəyini bildirib. Hesab edirəm ki, Prezident İlham Əliyevin müəyyənləşdirdiyi siyasi konsepsiya Azərbaycanı regional güc olma yolunda irəliyə apararaq, 2023-cü ildə də xalqımız və dövlətimiz üçün böyük imkanlar yaradacaq”, - deyə Y.Hacızadə vurğulayıb.