Polşa Almaniya ilə sərhəddə nəzarət tədbirlərinin müddətini 2026-cı ilin aprelinədək uzadıb
Berlin, 2 oktyabr, AZƏRTAC
Polşa Almaniya ilə dövlət sərhədində oktyabrın 4-dək nəzərdə tutulan yoxlamaların gələn il aprelin 4-dək uzadılması barədə qərar qəbul edib.
AZƏRTAC xəbər verir ki, bu barədə Polşa Daxili İşlər Nazirliyinin X səhifəsində məlumat verilib.
Almaniya ilə yanaşı, Polşanın Litva ilə sərhədində də nəzarət tədbirlərinin müddəti uzadılıb. Bunun Baltik ölkələrindən Polşa ərazisindən Qərbi Avropaya istiqamətində miqrasiya marşrutuna nəzarət məqsədi daşıdığı, Qərbə miqrantları qaçaqmalçılıq yolu ilə aparmağa çalışan şəxslərin yaxalanması üçün həyata keçirildiyi qeyd olunub.
Qeyd edək ki, bu ilin ilk səkkiz ayında Polşa-Belarus sərhədində təxminən 25 min qanunsuz keçmə cəhdi qeydə alınıb. Həmçinin Litvadan Polşaya qanunsuz daxil olmuş 500 nəfər üçüncü ölkə vətəndaşı, Polşadan Almaniyaya keçməyə cəhd göstərən 2100-dən çox şəxs saxlanılıb. Yanvar-avqust aylarında Polşa-Litva sərhədində təxminən 60 insan qaçaqçısı həbs edilib.
Polşa hökuməti sərhəd yoxlamalarını iyulda Almaniyanın sərhəd nəzarətlərinə cavab olaraq tətbiq etmişdi. Almaniya isə 2023-cü ildən etibarən Polşa sərhədində yoxlamalar aparır.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
