Polşanın hərbi konsernləri ili rekord mənfəətlə başa vurur
Bakı, 15 dekabr, AZƏRTAC
Polşanın ən böyük müdafiə şirkətləri olan “PGZ” (Polska grupa zbrojeniowa) və “Grupa WB” 2025-ci ili rekord mənfəətlə başa vuracaq.
AZƏRTAC xəbər verir ki, “Rzeczpospolita” qəzetinin məlumatına görə, hər iki şirkətin ümumi illik gəliri təxminən 25 milyard zlotı (təxminən 6,25 milyard dollar) təşkil edəcək ki, bu məbləğin 20 milyard zlotıdan çoxu “PGZ” konserninin payına düşəcək.
Ötən il “PGZ” şirkətinin mənfəəti 13,9 milyard zlotı (təxminən 3,47 milyard dollar) olub ki, bu da 2025-ci illə müqayisədə təxminən 40 faiz azdır. 2021-ci ildə isə konserninin gəliri 6 milyard zlotını (təxminən 1,5 milyard dollar) keçməyib.
Nəşr qeyd edir ki, Polşanın əsas özəl silah şirkəti olan “Grupa WB” konserninin mənfəəti 2021-2025-ci illər arasında təxminən doqquz dəfə artaraq 340 milyon zlotıdan (təxminən 85 milyon dollar) 3 milyard zlotıya (təxminən 750 milyon dollar) çatıb.
Ekspertlərin proqnozuna görə, Polşa müdafiə şirkətlərinin gəlirləri növbəti il də artmaqda davam edəcək.
Bölmənin digər xəbərləri
