Portuqaliyanın yeni Prezidenti seçilib
Bakı, 9 fevral, AZƏRTAC
Müxalifətdə olan Sosialist Partiyasının (PS) namizədi Antonio Jose Sequro bazar günü keçirilən prezident seçkilərinin ikinci turunda səslərin 66,2%-ni qazanaraq Portuqaliyanın yeni Prezidenti seçilib.
AZƏRTAC xarici mediaya istinadla xəbər verir ki, ardıcıl iki müddət xidmət etdikdən sonra yenidən namizədliyini irəli sürə bilməyən Marselo Rebelo de Sousanın yerinə yeni dövlət başçısı seçmək üçün 11 milyondan çox seçici seçki məntəqələrinə gedib.
Portuqaliya Milli Seçki Komissiyası tərəfindən açıqlanan rəsmi nəticələrə görə, Sequro səslərin 66,2%-ni, ifrat sağçı “Çeqa” partiyasının lideri Andre Ventura isə 33,8%-ni toplayıb.
Bu nəticə ilə 63 yaşlı Sequro 1974-cü ildən bəri Portuqaliyanın demokratik tarixində səkkizinci Prezident olub.
Baş nazir Luis Monteneqro fevralın 9-da Antonio Jose Sequronun ikinci tur səsverməsində qalib gəldikdən sonra Prezident seçildiyini açıqlayıb. Jurnalistlərə açıqlama verən Monteneqro bildirib ki, partiyasının prezident seçkilərində ağır məğlubiyyətinə baxmayaraq, azlıq hökuməti işini davam etdirəcək. Baş nazir vurğulayıb ki, Portuqaliya xalqı sabitlik istəyir.
Bölmənin digər xəbərləri
