Prezident İlham Əliyevin Almaniyaya rəsmi səfəri münasibətlərdə yeni inkişaf mərhələsinin əsasını qoyur – ŞƏRH
Bakı, 22 iyul, AZƏRTAC
Prezident İlham Əliyevin Almaniya Federativ Respublikasına rəsmi səfəri Azərbaycan–Almaniya münasibətlərinin keyfiyyətcə yeni mərhələyə yüksəlməsinə xidmət edən mühüm siyasi hadisədir.
Bu fikri AZƏRTAC-a açıqlaması zamanı Milli Məclisin deputatı Rizvan Nəbiyev bildirib.
Deputat qeyd edib ki, 2004-cü ildə Prezident İlham Əliyevin Almaniyaya ilk rəsmi səfəri ilə əsası qoyulan ali səviyyəli siyasi dialoq bu günədək Almaniyanın bütün federal kanslerləri və federal prezidentləri ilə ardıcıl şəkildə davam etdirilib. Federal Kansler Fridrix Mertsin dəvəti ilə baş tutan növbəti rəsmi səfər Azərbaycan Prezidentinə göstərilən yüksək etimadın və ölkəmizin etibarlı tərəfdaş kimi qəbul edilməsinin bariz nümunəsidir. Rəsmi və işgüzar səfərlərin sayına görə 18-ci olan bu səfər Bakı ilə Berlin arasında siyasi dialoqun yüksək intensivliyini bir daha nümayiş etdirir.
R.Nəbiyev qeyd edib ki, 2018-ci ildə Almaniyanın Federal Kansleri Angela Merkelin, 2023-cü ildə isə Federal Prezident Frank-Valter Ştaynmayerin Azərbaycana səfərləri də ikitərəfli münasibətlərin inkişafına verilən önəmin göstəricisidir. Eyni zamanda, Prezident İlham Əliyevin Münxen Təhlükəsizlik Konfransının mütəmadi dəvət olunan və çıxışları maraqla dinlənilən ali qonaqları sırasında yer alması Azərbaycanın beynəlxalq nüfuzunun göstəricisidir.
Deputatın sözlərinə görə, iyulun 20-də başlayan rəsmi səfər Azərbaycan–Almaniya əməkdaşlığının geniş gündəliyini əhatə etməklə yanaşı, Avropa ilə tərəfdaşlığın daha da dərinləşdirilməsi baxımından da xüsusi əhəmiyyət daşıyır.
“Bu səfər enerji təhlükəsizliyi, logistika, investisiya, regional təhlükəsizlik və iqtisadi əməkdaşlıq sahələrində yeni imkanlar açır. Azərbaycanın ərazi bütövlüyünü və suverenliyini tam bərpa etməsindən sonra Cənubi Qafqazda formalaşan yeni siyasi reallıqlar həm Almaniya, həm də Avropa İttifaqı ilə münasibətlərdə əməkdaşlıq üçün yeni perspektivlər yaradıb. Xüsusilə Orta Dəhlizin artan əhəmiyyəti, Azərbaycanın müasir nəqliyyat və logistika infrastrukturu Avropa üçün strateji əhəmiyyət daşıyır. Yaxın Şərqdə davam edən hərbi gərginlik və Rusiya–Ukrayna müharibəsi fonunda Avropanın Cənubi Qafqaz və Mərkəzi Asiya ilə əməkdaşlığı daha da aktuallaşıb. Almaniya Azərbaycanın Avropada əsas siyasi və iqtisadi tərəfdaşlarından biridir. Siyasi dialoqla yanaşı, enerji, sənaye, nəqliyyat, logistika, təhsil və humanitar sahələrdə əməkdaşlıq ardıcıl şəkildə inkişaf edir. Azərbaycanın Avropanın enerji təhlükəsizliyinə verdiyi töhfə Almaniyada yüksək qiymətləndirilir. Mövcud geosiyasi şərait yaşıl enerji, hidrogen iqtisadiyyatı, rəqəmsal transformasiya, süni intellekt, yüksək texnologiyalar, sənaye kooperasiyası və logistika sahələrində əməkdaşlığın genişləndirilməsi üçün əlverişli imkanlar yaradır. Qarabağ və Şərqi Zəngəzurda həyata keçirilən bərpa-quruculuq işləri və yaşıl enerji layihələri alman şirkətlərinin iştirakı üçün mühüm perspektivlər açır”, - deyə Rizvan Nəbiyev əlavə edib.
Deputat xatırladıb ki, Almaniya Xarici İşlər Nazirliyinin məlumatına əsasən, Azərbaycan Almaniyanın Cənubi Qafqazda ən mühüm iqtisadi tərəfdaşıdır. 2024-cü ildə iki ölkə arasında ticarət dövriyyəsi təxminən 1,7 milyard avro təşkil edib. Almaniyanın Azərbaycandan idxalı 1,07 milyard avro, Azərbaycana ixracı isə 623 milyon avro olub. R.Nəbiyev vurğulayıb ki, Almaniyanın Cənubi Qafqazda yeganə Xarici Ticarət Palatası (AHK) 2012-ci ildən Bakıda fəaliyyət göstərir və hazırda 196 üzv şirkəti ilə Azərbaycanda fəaliyyət göstərən ən böyük Avropa biznes birliyidir: “Azərbaycan Almaniyanın xam neft tədarükü üzrə ilk on tərəfdaşı sırasında yer alır. Bundan başqa, 2026-cı ilin əvvəlindən etibarən Almaniyaya Azərbaycan təbii qazının ixracı həyata keçirilir və SOCAR ilə "Uniper" şirkəti arasında 2045-ci ilədək qüvvədə olan uzunmüddətli qaz tədarükü müqaviləsi uğurla icra edilir. Ticarət və investisiya əlaqələrinin inkişafı məqsədilə 2011-ci ildə yaradılmış Azərbaycan–Almaniya Yüksək Səviyyəli İşçi Qrupu bu istiqamətdə mühüm platforma rolunu oynayır. Humanitar və təhsil sahəsində əməkdaşlıq da uğurla inkişaf edir. Alman dili Azərbaycanda ən çox öyrənilən xarici dillərdən biridir, Almaniya universitetləri ilə Azərbaycan ali məktəbləri arasında 20-dən çox əməkdaşlıq sazişi mövcuddur. Mədəni-humanitar əlaqələr də iki ölkə arasında qarşılıqlı etimadın möhkəmlənməsinə xidmət edir”.
Rizvan Nəbiyev, həmçinin qeyd edib ki, Prezident İlham Əliyevin Almaniyaya rəsmi səfəri siyasi dialoqun daha da möhkəmlənməsinə, iqtisadi əlaqələrin genişlənməsinə, qarşılıqlı investisiyaların artmasına və Azərbaycan–Almaniya münasibətlərinin yeni inkişaf mərhələsinə qədəm qoymasına mühüm töhfə verəcək. Bu səfər Azərbaycanın Avropa ilə qarşılıqlı hörmətə, praqmatik əməkdaşlığa və ortaq maraqlara əsaslanan xarici siyasət kursunun növbəti uğurlu təzahürü kimi tarixə düşəcək.
Bölmənin digər xəbərləri
