Prezident İlham Əliyev Qlobal Media Forumunda dünyaya mühüm mesajlar verdi - Deputat
Bakı, 22 iyul, AZƏRTAC
Ölkəmizin mədəniyyət paytaxtı Şuşa özünün tarixi irsi ilə yanaşı, Azərbaycanın ictimai-siyasi həyatında da özünəməxsus rol oynayıb. Azərbaycanın ictimai-siyasi fikir tarixində mühüm yer tutan bir sıra görkəmli şəxsiyyətlər, maarifçi ziyalılar məhz Şuşada doğulub boya-başa çatıblar. Həmin şəxslər Şuşada fəaliyyət göstərən, dövrün qabaqcıl təhsil müəssisələrinin yetirmələri idilər. Belə ki, Şuşada fəaliyyət göstərən xəttatlıq, teatr, musiqi, vokal, eləcə də ilk qızlar, rus-tatar məktəbləri, realnı məktəbi yerli əhalinin intellektual səviyyəsini, dünyagörüşünü inkişaf etdirməyə, şəhərin ziyalı səviyyəsini qoruyub saxlamağa imkan verib.
Bu sözləri AZƏRTAC-a açıqlamasında Milli Məclisin deputatı Fatma Yıldırım söyləyib.
Deputat bildirib ki, Prezident İlham Əliyevin Şuşa şəhərinə budəfəki səfərində tikintisinin gedişi ilə tanış olduğu 1 saylı tam orta məktəb də məhz bu baxımdan xüsusi əhəmiyyət daşıyır. Belə ki, məktəb binasının inşası bu qədim şəhərin təhsil mərkəzi kimi şöhrətinin qaytarılması missiyasına xidmət edən növbəti addımdır. Dövlətimizin başçısının səfər zamanı Şuşa şəhər xəstəxanasının tikintisi ilə maraqlanması da bir daha təsdiqləyir ki, əhalinin sağlamlığı daim dövlətimizin başçısının diqqət mərkəzindədir. Bu baxımdan işğaldan azad edilən ərazilərdə tibb və səhiyyə xidmətlərinin təşkili üçün qısa müddətdə genişmiqyaslı işlər həyata keçirilir. Şuşa şəhər xəstəxanası burada yaşayacaq əhalinin tibbi təminatı və sağlamlığının qorunması istiqamətində Prezident İlham Əliyevin birbaşa göstərişi və rəhbərliyi ilə icra olunan infrastruktur layihələrindən biridir. Bu, həm də onu göstərir ki, azad edilmiş digər ərazilərdə olduğu kimi, Şuşada da sosial obyektlərin inşası dövlətimiz üçün prioritet məsələlərdəndir.
Deputatın sözlərinə görə, tarixi Şuşa şəhəri işğaldan azad olunduqdan sonra mühüm yerli və beynəlxalq tədbirlərə ev sahibliyi edib. Şuşa Qlobal Media Forumu da bu baxımdan böyük əhəmiyyət kəsb edir. Forumda 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumunun, eləcə də 60 yerli media rəhbəri və nümayəndəsinin iştirakı bu tədbirin önəminin göstəricisidir. Prezident İlham Əliyev Forumda bir çox məsələlərlə bağlı fikirlərini açıqladı, mühüm mesajlar verdi. Dövlətimizin başçısı çıxışında regionda vəziyyət, Azərbaycanla Ermənistan arasında münasibətlərin normallaşdırılması, işğaldan azad olunmuş ərazilərimizdə quruculuq işləri, keçmiş məcburi köçkünlərin məskunlaşdırılması və digər məsələlərə toxundu, fikirlərini açıqladı. Prezident İlham Əliyev Ermənistanın Azərbaycana qarşı ərazi iddialarından imtina edəcəyi təqdirdə, sülh sazişinin ilin sonuna qədər imzalanmasının mümkünlüyünü də diqqətə çatdırdı.
Ən vacib məqamlardan birinin məhz keçmiş məcburi köçkünlərin doğma yurdlarına qayıtmasının olduğunu qeyd edən F.Yıldırım Qarabağın və Şərqi Zəngəzurun bərpası prosesinin mərhələlərlə aparıldığını və artıq Böyük Qayıdış üzrə Dövlət Proqramının qəbul edildiyini bildirib.
“Qarabağın erməni sakinlərinə gəlincə, dövlətimizin başçısı Forumda bu məsələ ilə bağlı aydın şəkildə mövqeyini ifadə etdi. Bu mövqe ondan ibarətdir ki, Qarabağdakı erməni azlığının hüquqları və təhlükəsizliyi Konstitusiyamıza uyğun olaraq qorunacaq”, - deyə Fatma Yıldırım qeyd edib.
Bölmənin digər xəbərləri
