Professor Fəridə Səfiyevanın “İrəvan: tarixi həqiqətlər və şəxsiyyətlər” kitabının təqdimatı olub
Bakı, 21 oktyabr, AZƏRTAC
Qərbi Azərbaycan İcmasında (QAİ) “Kainat” Milli-Mənəvi Dəyərlərin Təbliğinə Dəstək İctimai Birliyinin təsisçisi, QAİ Qadınlar Şurasının üzvü, İrəvan Şəhər İcmasının sədri, filologiya elmləri doktoru, professor Fəridə Səfiyevanın “İrəvan: tarixi həqiqətlər və şəxsiyyətlər” kitabının təqdimatı keçirilib. QHT-lərə Dövlət Dəstəyi Agentliyinin dəstəyi ilə çap olunmuş kitab ötən əsrdə Qərbi azərbaycanlıların deportasiyaları zamanı İrəvanda baş vermiş hadisələrdən və şəhərin tanınmış şəxsiyyətlərindən bəhs edir.
AZƏRTAC xəbər verir ki, tədbiri giriş sözü ilə açan Qərbi Azərbaycan İcmasının Aparat rəhbəri Qalib Qasımov təqdim olunan kitabın dəyərli mənbə olduğunu vurğulayıb.
İcmanın Müşahidə Şurasının sədri, AMEA-nın müxbir üzvü, fizika-riyaziyyat elmləri doktoru, professor Misir Mərdanov kitabda İrəvan tarixi üçün önəmli məqamların işıqlandırıldığını diqqətə çatdırıb. O, bu tədqiqat əsərinin İrəvanın tarixi həqiqətlərini və şəxsiyyətlərini daha dərindən öyrənmək üçün mühüm əhəmiyyətə malik olduğunu vurğulayıb.
Qərbi Azərbaycan İcması İdarə Heyətinin üzvü, AMEA Tarix və Etnologiya İnstitutunda Qərbi Azərbaycan tarixi şöbəsinin müdiri, tarix üzrə fəlsəfə doktoru Cəbi Bəhramov, İcmanın Ziyalılar Şurasının sədr müavini, pedaqoji elmlər doktoru, professor, ADPU-nun kafedra müdiri Fərrux Rüstəmov, Qərbi Azərbaycan İcması Qadınlar Şurasının üzvü, "Şöhrət” ordenli Əməkdar jurnalist, yazıçı və publisist, Prezidentin fərdi təqaüdçüsü Flora Xəlilzadə, İcmanın Qadınlar Şurasının sədr müavini, Teleradio Akademiyasının rektoru, AzTV Yayım Şurasının üzvü, Əməkdar mədəniyyət işçisi Telli Pənahqızı, İcmanın Ziyalılar Şurasının üzvü, fəlsəfə üzrə fəlsəfə doktoru Etibar Əliyev, iqtisad elmləri doktoru, professor, Azərbaycan Respublikasının Prezidenti yanında Dövlət İdarəçilik Akademiyasının kafedra müdiri Xatirə Hüseynova, İcmanın Ağsaqqallar Şurasının üzvü, Azərbaycan Dövlət İqtisad Universitetinin kafedra müdiri, iqtisad elmləri doktoru, professor, Əməkdar müəllim Əvəz Ələkbərov çıxışlarında qeyd ediblər ki, İrəvan şəhərinin tarixi və şəxsiyyətləri haqqında məlumatların toplanması və nəşr edilməsi gələcək nəsillərin məlumatlanması baxımından önəmlidir. Natiqlər eyni kitabın daha da təkmilləşdirilərək xarici dillərə tərcümə olunmasının əhəmiyyətini vurğulayıblar.
Kitabın müəllifi Fəridə Səfiyeva vurğulayıb ki, İrəvan şəhərində Azərbaycan xalqına qarşı soyqırımı aktının həyata keçirilməsi və bu həqiqətlərlə yanaşı İrəvan şəxsiyyətlərinin tanıdılması baxımdan kitabın yayılması məqsədəuyğundur. Onun sözlərinə görə, “İrəvan: tarixi həqiqətlər və şəxsiyyətlər” kitabı Azərbaycan Respublikasının Prezidenti İlham Əliyevin alimlərə çağırışına cavab olaraq yazılıb. Professor əlavə edib: “İndi əsas məsələ dünya ictimaiyyətinin də bu həqiqətləri bilməsini təmin etməkdir”.
Müəllif kitabın Qərbi Azərbaycan həqiqətlərinin dünyaya çatdırılması istiqamətində dövlətimizin gördüyü genişmiqyaslı işlərin tərkib hissəsi olacağına ümid etdiyini bildirib.
Bölmənin digər xəbərləri
