Professor Fərrux Rüstəmov: Zəfər Günü qürurumuzun, birliyimizin və qəhrəmanlığımızın rəmzidir
Bakı, 6 noyabr, AZƏRTAC
Zəfər Günü Azərbaycan tarixinin ən parlaq və qürurverici səhifələrindən biridir. Bu gün xalqımızın qəhrəmanlıq salnaməsinə qızıl hərflərlə yazılıb. Zəfərimizin beşinci ildönümündə Vətən uğrunda canını fəda edən qəhrəmanlarımızın xatirəsini ehtiramla yad edirik.
Bu fikirləri AZƏRTAC-a müsahibəsində Azərbaycan Dövlət Pedaqoji Universitetinin İbtidai təhsilin pedaqogikası kafedrasının müdiri pedaqoji elmlər doktoru professor Fərrux Rüstəmov bildirib.
Professor qeyd edib ki, 2020-ci ilin 8 Noyabrı xalqımızın tarixində və taleyində möhtəşəm gündür. Həmin gün Müzəffər Ali Baş Komandan İlham Əliyevin müdrik rəhbərliyi, igid əsgər və zabitlərimizin şücaəti, xalqımızın sarsılmaz birliyi sayəsində 30 illik işğala və ədalətsizliyə son qoyulub. Düşmənin illərlə işğal altında saxladığı torpaqlarımız azad edilib, ərazi bütövlüyümüz bərpa olunub. Bu qələbə ilə əsrlər boyu xalqımıza qarşı yönəlmiş planlar alt-üst oldu, 200 illik xülyalar, işğal və genişlənmə siyasəti tarix səhnəsindən silindi. Erməni qəsbkarları tərəfindən xülya kimi irəli sürülən “dənizdən-dənizə” iddiaları Azərbaycan Ordusunun dəmir yumruğu qarşısında tam iflasa uğradı.
Prezident İlham Əliyevin sözləri ilə desək, Azərbaycan Ordusu şəhidlərimizin qanı, qazilərimizin fədakarlığı, xalqımızın iradəsi ilə düşmən üzərində parlaq, tam və mütləq qələbə qazandı. Bu qələbə təkcə hərbi zəfər deyildi – bu, xalqın birliyinin, dövlətin gücünün, ədalətin və haqqın təntənəsi idi.
Vətən müharibəsi dövründə Ali Baş Komandan İlham Əliyev Azərbaycanın haqq səsini dünyaya çatdırdı. Onun dəqiq, məntiqli və qətiyyətli çıxışları yalnız düşməni deyil, beynəlxalq ictimaiyyəti də heyran etdi. Azərbaycan təkcə döyüş meydanında deyil, informasiya cəbhəsində də zəfər qazandı.
Bu gün Zəfərin beşinci ildönümü bir daha göstərir ki, biz bir olduqda, birlikdə olduqda, heç bir qüvvə qarşımızda dayana bilməz.
Zəfər Günü - xalqımızın fədakarlığının və qürurunun, Vətən sevgisinin və qəhrəmanlığının, azadlıq eşqinin və milli birliyinin rəmzidir. Zəfər Günü müstəqil Azərbaycanın gücünü, xalqın sarsılmaz iradəsini, dövlətin əzəmətini simvolizə edən əbədi bir tarixdir.
Bölmənin digər xəbərləri
