Sentyabrın 26-da Azərbaycan qadınlarının III qurultayı keçiriləcəkdir. Azərbaycan Respublikası Ailə, Qadın və Uşaq Problemləri üzrə Dövlət Komitəsinin sədri Hicran Hüseynova qurultay ərəfəsində AZƏRTAC-a müsahibə vermişdir. Komitə sədri demişdir:

-Ölkəmizdə dövlət qadın siyasətinin əsaslarının yaradılması ümummilli liderimiz Heydər Əliyevin adı ilə bağlıdır. Ulu öndərimiz Azərbaycana rəhbərlik etdiyi bütün dövrlərdə qadınlarla bağlı məsələlərə xüsusi diqqət vermiş, onların həyatımızın bütün sahələrində irəli çəkilməsini vacib hesab etmişdir. 1998-ci il yanvarın 14-də dahi Heydər Əliyevin Fərmanı ilə Qadın Problemləri üzrə Dövlət Komitəsinin yaradılması Azərbaycan qadınlarının həyatında mühüm bir hadisəyə çevrildi. Bu, ölkədə qadın problemlərinin həllini dövlət səviyyəsində həyata keçirən vahid bir qurum olaraq ailələrə yaxın bir dəstəyə çevrildi. Dövlət başçısının 2006-cı il 6 fevral tarixli Fərmanı ilə yaradılmış Ailə, Qadın və Uşaq Problemləri üzrə Dövlət Komitəsinin fəaliyyətə başlaması isə ölkədə müvafiq sahələr üzrə problemlərin həlli üçün zəmin yaratdı. Respublikada ailə, qadın və uşaq siyasətinin həyata keçirilməsi üzrə milli mexanizm olan Komitə bütün fəaliyyəti ilə hər şeydən əvvəl ölkə qadınlarının ictimai və siyasi fəallığına dəstək olmağa çalışır. Biz qadın və kişilərin qərar qəbuletmədə bərabər iştirakı məsələsinə xüsusi diqqət yetiririk. Azərbaycan hökuməti qadın və kişilərin ictimai və siyasi qərar qəbuletmədə balanslaşdırılmış iştirakını təmin etmək və beynəlxalq hüquqi sənədlərdən irəli gələn öhdəlikləri daha yaxşı yerınə yetirmək üçün müvafiq tədbirlər həyata keçirir.

Bu gün Azərbaycanın birinci xanımı Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban Əliyeva şəxsi nümunəsi və çoxşaxəli ictimai fəaliyyəti ilə cəmiyyətdə yüksək nüfuz qazanmışdır. Mehriban xanım Əliyeva işinin çox olmasına baxmayaraq, fəaliyyətinin əsas hissəsini qadın və uşaqların problemlərinin həllinə, eyni zamanda, milli mədəni sərvətlərimizin qorunmasına yönəldir. Qaçqın və məcburi köçkün ailələrinin uşaqlarına, xüsusi yardıma və qayğıya ehtiyacı olan əlil və xəstə uşaqlara ayrıca diqqət yetirir, onların problemlərinin həllinə kömək edir. Mehriban xanımın çoxşaxəli fəaliyyəti qadınlarımızı ölkənin ictimai-siyasi həyatında daha fəal olmağa ruhlandırır.

Demokratik cəmiyyətin əsas qurucuları olan qadınlar, əlbəttə ki, ilk növbədə özlərinin əsas vəzifələrini - analıq missiyalarını yerinə yetirməyə üstünlük versələr də, ictimai və siyasi həyatımızda da əhəmiyyətli mövqe tuturlar. Biz Azərbaycan Prezidentinin 2000-ci il 6 mart tarixli “Dövlət qadın siyasətinin həyata keçirilməsi haqqında” Fərmanının icrası ilə əlaqədar nazirliklərdən və digər dövlət qurumlarından alınmış məlumatları sistemləşdirmişik. Bölgələrlə əlaqələrin gücləndirilməsi məqsədi ilə bütün nazirlik və komitələrə, o cümlədən dövlət agentlikləri və şirkətlərinə sorğu göndərilmişdir. 2006-cı il 10 oktyabr tarixli “ Gender (qadın və kişilərin) bərabərliyinin təminatları haqqında” Qanuna və Avropa Şurasının tövsiyələrinə əsasən gender bərabərliyinin təmin olunması Ailə, Qadın və Uşaq Problemləri üzrə Dövlət Komitəsinin fəaliyyətinin prioritet istiqamətlərindən biridir. Bu sahədə işlərin səmərəli təşkili məqsədi ilə nazirlik və digər dövlət qurumlarında qadın problemləri üzrə məsul şəxslərdən ibarət Əlaqələndirici Şura yaradılmışdır. Komitəmiz ailələr, qadınlar və uşaqlarla bağlı dövlət siyasətini həyata keçirən bir qurum olaraq ailələrin rifahının daha da yüksəldilməsi, qadınların ictimai-siyasi fəallığının artırılması və uşaqların hüquqlarının təmin edilməsi sahəsində ardıcıl və məqsədyönlü iş aparır.

-Azərbaycanda ailə, qadın və uşaqlarla bağlı həllini gözləyən məsələ qalmaqdadır. Ötən müddətdə hansı problemləri aradan qaldırmağa müvəffəq olmusunuz?

-Ölkəmizdə əhalinin həyat səviyyəsinin gündən-günə yüksəlməsinə baxmayaraq, həllini gözləyən problemlərimiz vardır: məişət zorakılığı, təhsildən yayınma, erkən nikahlar, narkomaniya, QİÇS, ekoloji problemlər, uşaq əlilliyi və s. Məlum olduğu kimi, Qarabağ münaqişəsi, keçid dövrünün çətinlikləri cəmiyyətimizə xas olmayan bir sıra mənfi halların meydana çıxmasına səbəb olmuşdur. Qaçqın və məcburi köçkün ailələrinin mövcudluğu, insanların öz hüquqlarını bilməməsi, yaranmış yeni şəraitə çətin uyğunlaşması kimi problemlər də elə bu səbəbdən yaranır. Buna görə də son illər bu istiqamətdə problemlərin dövlət səviyyəsində aradan qaldırılması üçün önəmli addımlar atılır. Əhalinin həyat səviyyəsinin, vətəndaşların sosial durumunun yüksəlməsi bu prosesə ciddi təkan verir. Dövlət Komitəsi olaraq bizim əsas vəzifəmiz problemlərin həllində insanlara kömək etmək, onlara düzgün yol göstərməkdən ibarətdir. Deməliyəm ki, Komitənin rəhbər işçiləri, ekspertlərimiz tez-tez bölgələrdə olur, toplantılar keçirir, əhalinin problemləri ilə yerlərdə yaxından tanış olurlar. Biz ailələri narahat edən məsələləri yerindəcə öyrənib imkan daxilində vaxtında həll etməyə çalışırıq.

-Sabah Azərbaycan qadınlarının III qurultayı keçiriləcək. Qurultay Azərbaycanda qadın hərəkatının inkişafında yeni mərhələ olmaqla, qadınlarımıza hansı töhfələri verəcəkdir?

-Bu gün qadınlarımızın öz potensiallarından tam istifadə etmələri üçün hər cür imkanları vardır. Dünən olduğu kimi, bu gün də Azərbaycanın şanlı tarixini yazanlar arasında fəxr etdiyimiz, varlığından qürur duyduğumuz qadınlar çoxdur. Onlar daha yüksək fəallıqları ilə seçilir, ailə dəyərlərini qoruyub saxlamaqla seçdikləri sahədə də uğurlar qazanırlar. Çalışdıqları təşkilatlarda yüksək bacarıq, peşəkarlıq və istedad göstərərək ictimai-siyasi həyat səviyyəmizin daha da yüksəlməsi üçün əllərindən gələni edirlər. Builki qurultayqabağı toplantıların əvvəlkilərdən fərqi o idi ki, ayrı-ayrı sahələrdə çalışan qadınlar (hüquqşünas, sahibkar, yaradıcı qadınlar və qeyri-hökumət qadın təşkilatlarının nümayəndələri) öz konfranslarını keçirdilər. Burada qadınlar onların daha səmərəli fəaliyyət göstərmələri üçün geniş imkanlar yaradılmasının vacib olduğunu xüsusilə vurğuladılar.

Azərbaycan qadın hərəkatı tarixində yeni bir mərhələ olan bu qurultay ötən 5 il ərzində gördüyümüz işlərin təhlilini verməklə, gələcək fəaliyyətimizi əhatə edən qərarlar qəbul edəcəkdir.

######