QADINLARIN İCTİMAİ-SİYASİ FƏALLIĞI DAHA DA ARTACAQDIR
AZƏRTAC xəbər verir ki, sentyabrın 25-də Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Azərbaycan qadınlarının III qurultayında iştirak etmək üçün Bakıya gəlmiş xarici qonaqların bir qrupu ilə görüşmüşdür.
H.Hüseynova Azərbaycan qadınlarının inkişaf yolundan danışmışdır. Ölkəmizdə ilk qadın məktəbinin 1901-ci ildə açıldığını, 1918-ci ildə isə müsəlman Şərqində ilk dəfə Azərbaycan qadınlarının seçilmək və seçmək hüququ qazandıqlarını xatırladan komitə sədri demişdir ki, bu faktlar bizi həmin inkişafı davam etdirməyə sövq edir.
Qeyd edilmişdir ki, ölkəmizdə dövlət qadın siyasəti ümummilli lider Heydər Əliyev tərəfindən müəyyən edilmişdir, müstəqil Azərbaycanda qadın qurultayları məhz ulu öndərin təşəbbüsü ilə keçirilir.
Qonaqlar Azərbaycana səfərlərindən, ölkəmizdə gördükləri inkişafdan məmnunluqlarını bildirmişlər.
Görüşdə Türkiyənin qadın və ailə məsələləri üzrə dövlət naziri Nimət Çubukçu, Küveytin Qadın Məsələləri üzə Komitəsi sədrinin müavini Şeyxə Hassa Abdulla Səlim Əl Sabah, İordaniya Qadın Məsələləri üzrə Milli Komissiyasının Baş katibi Əsma Hanna Salem Xader, Litvanın Müdafiə Nazirliyinin Dövlət katibi Yurate Raqutskene, Amerika-Azərbaycan Cəmiyyətinin sədri Tomris Azəri və başqaları iştirak etmişlər.
Bölmənin digər xəbərləri
