Qalib lider amili: Ölkəmizin dünyada artan nüfuzu və yeni reallıqlar - BDU-da tədbir
Bakı, 18 dekabr, AZƏRTAC
Bakı Dövlət Universitetinin Geologiya fakültəsi və Yeni Azərbaycan Partiyasının (YAP) Yasamal rayon təşkilatının birgə təşəbbüsü ilə “Konstitusiya və Suverenlik İli” çərçivəsində “Qalib lider faktoru: Ölkəmizin dünyada artan nüfuzu və yeni reallıqlar” mövzusunda tədbir keçirilib. Əvvəlcə Dövlət Himni səsləndirilib, Ümummilli Lider Heydər Əliyevin və şəhidlərimizin əziz xatirələri bir dəqiqəlik sükutla yad edilib.
Sonra müasir Azərbaycanın inkişaf yolunu özündə əks etdirən videoçarx nümayiş etdirilib.
Bu barədə AZƏRTAC-a BDU-dan məlumat verilib. BDU-nun Geologiya fakültəsinin dekanı Mamoy Mansurov “Konstitusiya və Suverenlik İli”nin ölkəmizin müasir tarixində xüsusi yerə malik olduğunu bildirib. O qeyd edib ki, Ulu Öndər Heydər Əliyev tərəfindən müəyyən edilən konstitusion prinsiplər bu gün ölkənin siyasi, iqtisadi və sosial həyatının dayanıqlı inkişafını təmin edir. Ümummilli Liderin müəyyən etdiyi strateji xətti uğurla davam etdirən Azərbaycan Respublikasının Prezidenti İlham Əliyev bu gün ölkəmizi regionun ən güclü hüquqi dövlət modellərindən birinə çevirib.
Geologiya fakültəsinin tədris işləri üzrə dekan müavini İlqar Quliyev çıxışında ali təhsilin dövlətçilik ideyalarının təbliğində mühüm rolundan danışıb. Qeyd edib ki, “Konstitusiya və Suverenlik İli” çərçivəsində keçirilən bu cür tədbirlər tələbələrin yalnız peşəkar mütəxəssis kimi deyil, vətənpərvər, hüquqi və siyasi baxımdan məlumatlı vətəndaş kimi formalaşmasına xidmət edir. O, Geologiya fakültəsində tədrisin müasir tələblərə uyğun qurulduğunu, elmi biliklərlə yanaşı, milli-mənəvi dəyərlərin də tələbələrə aşılandığını bildirib.
Milli Məclisinin Gənclər və idman komitəsinin sədri, YAP İdarə Heyətinin üzvü Şahin İsmayılov qeyd edib ki, qalib lider faktoru Azərbaycanın dövlətçilik tarixində Ulu Öndər Heydər Əliyevin yaratdığı möhkəm təməllər üzərində formalaşıb: “Ulu Öndərin qurucu siyasəti müstəqil Azərbaycanın gələcək inkişaf strategiyasını müəyyənləşdirdi. Bu siyasi kurs Prezident İlham Əliyev tərəfindən müasir çağırışlara uyğun şəkildə uğurla davam etdirilir. Nəticədə ölkəmizin beynəlxalq nüfuzu davamlı şəkildə artmaqdadır”.
YAP Yasamal rayon təşkilatının sədri Bəxtiyar Nəbiyev ölkəmizin artan beynəlxalq nüfuzunun Ulu Öndər Heydər Əliyevin əsasını qoyduğu müstəqil dövlətçilik siyasətinin məntiqi nəticəsi olduğunu deyib. Qeyd edib ki, onun formalaşdırdığı güclü idarəetmə modeli müasir Azərbaycanın dayanıqlı inkişafını təmin etdi. Prezident İlham Əliyev bu siyasi xətti yeni reallıqlara uyğun şəkildə zənginləşdirib. Ölkəmizin qazandığı zəfərlər beynəlxalq hüquqa əsaslanan haqlı mövqeyimizin təsdiqinə çevrildi.
Milli Məclisinin deputatları Samir Vəliyev, Mahir Süleymanlı, BDU-nun Faydalı qazıntılar kafedrasının müdiri akademik Vasif Babazadə, YAP Yasamal rayon “Z.Xəlilov küç. 33” (BDU) ünvanı üzrə ərazi partiya təşkilatının sədri professor Zahid Cəfərov Azərbaycanın son onilliklərdə keçdiyi uğurlu yolun ideoloji əsasının Ulu Öndər Heydər Əliyevin qurucu siyasəti ilə müəyyənləşdirildiyini və Prezident İlham Əliyevin rəhbərliyi ilə aparılan bu siyasətin xalqın iradəsinə söykəndiyini vurğulayıblar.
Tədbirin sonunda “Konstitusiya və Suverenlik İli” çərçivəsində YAP-ın ictimai-siyasi həyatındakı fəaliyyətinə görə bir qrup BDU əməkdaşı fəxri fərmanla təltif olunub.
Bölmənin digər xəbərləri
