Qarabağ ermənilərinə humanitar yardımın göndərilməsi ölkəmizin erməni vətəndaşları ilə bağlı nəcib təşəbbüsüdür
Bakı, 30 avqust, AZƏRTAC
Azərbaycan Qırmızı Aypara Cəmiyyətinin Qarabağ ermənilərinə 40 ton humanitar yardım göndərməsini gündəmin ən aktual xəbərlərindən hesab edirəm. Bunu təkcə humanitar aksiya deyil, həm də ölkəmizin erməni vətəndaşlarımıza xoş bir jesti, nəcib təşəbbüsü kimi dəyərləndirmək lazımdır.
Bunu AZƏRTAC-a açıqlamasında ehtiyatda olan mayor, Qarabağ müharibəsi veteranı, hərbi ekspert Əbülfət Məhərrəmli deyib.
Ekspert bildirib ki, Azərbaycan rəhbərliyi Vətən müharibəsindən sonra dəfələrlə sülh naminə belə təkliflər irəli sürüb. İnanıram ki, Qarabağda yaşayan, əlləri azərbaycanlıların qanına bulaşmamış erməni vətəndaşların əksəriyyəti hadisələri adekvat dəyərləndirməyə, Bakıdan gətirilən yardımı qəbul etməyə, Azərbaycan dövlətinin xeyirxah təşəbbüslərinə dəstək verməyə hazırdırlar. Ancaq həm Xankəndi, həm İrəvan, həm də xaricdə məlum dairələr bölgədə insan haqları pərdəsi altında mahiyyət etibarilə separatçılığa açıq-aydın rəvac verir, əmin-amanlığın yaranmasına əngəl törədirlər.
Qarabağ müharibəsi veteranının sözlərinə görə, Ermənistan rəhbərliyinin bir-birinin ardınca törətdiyi təxribatlar, hayların hüquqlarının pozulması barədə BMT səviyyəsində şou-şivən qoparması, Azərbaycan hökumətinin razılığı olmadan guya yardım daşıyan maşın karvanının sərhədə göndərilməsi yalnız beynəlxalq dəstək qazanmaq üçün atılan addımlardır. Bəzi dövlətlərin ermənipərəst rəhbərliyinin məsələyə birtərəfli, ədalətsiz yanaşması problemin beynəlxalq qanunvericiliyə, Azərbaycanın suverenliyi və sərhədlərinin toxunulmazlığı prinsiplərinə riayət etməklə həllini çətinləşdirir. Əslində Xankəndidə ermənilərin aclıq çəkməsindən dəm vuranlar oradakı insanların aqibətindən çox öz prinsiplərini yeritməyə çalışırlar.
Azərbaycanın göndərdiyi yardımın qarşısını kəsənlər ailələri aclıq çəkənlər yox, cinayətkar Ruben Vardanyanın tərəfdarlarının olduğu erməni mətbuatından məlum olub.
“Ermənilər və onlara hamilik edən qüvvələr yalnız Laçın sərhəd-buraxılış məntəqəsinin açılmasında israr edir və bu zaman 2020-ci il noyabrın 9-da imzalanmış Üçtərəfli Bəyannaməyə istinad edirlər. Həmin bəyannaməni pozan Ermənistan tərəfidir. Çünki razılaşmanın 9-cu bəndinə görə Naxçıvanla nəqliyyat əlaqəsini təmin edən Zəngəzur dəhlizi də çoxdan fəaliyyətə başlamalı idi.
Azərbaycanın sərhədi karvansara yolu deyil ki, kim istəyir - keçsin, kim istəyir - çıxsın. Sərhədlərin toxunulmazlığı Azərbaycan üçün qırmızı xətdir və bütün təkidlərə rəğmən güzəşt yeri yoxdur. Bunu həm separatçılar, həm rəsmi İrəvan, həm də ermənilərin havadarları unutmamalıdırlar”, - deyə ehtiyatda olan mayor vurğulayıb.
Bölmənin digər xəbərləri
