“QARABAĞ” KOMANDASI ÖLKƏ FUTBOL KUBOKUNA SAHİB OLDU

03.06.2006 [22:23]
Çap et
A⁺ A^-

AZƏRTAC xəbər verir ki, iyunun 3-də “Şəfa” stadionunda “Karvan” və “Qarabağ” komandaları arasında ölkə futbol kuboku uğrunda final görüşü keçirilmişdir.

Oyunun ilk dəqiqəsində “Karvan”ın futbolçusu Roman Axalkadze rəqib qapısından birinci topu keçirmişdir. Görüşün 44-cü dəqiqəsində “Qarabağ”ın oyunçusu Vasif Haqverdiyev hesabı bərabərləşdirmişdir. Onun həmkarı Samir Musayev ikinci hissənin son dəqiqələrində “Karvan”ın qapısına daha bir top vurmuş və oyun 2:1 hesabı ilə ağdamlıların xeyrinə başa çatmışdır.

Beləliklə, “Qarabağ” komandası ölkə kubokuna sahib olmuş və çempionatın gümüş medalını qazanmış “Karvan” klubu ilə birgə respublikamızı UEFA kuboku uğrunda yarışlarda təmsil etmək hüququ qazanmışdır.

Xatırladaq ki, “Bakı” komandası Avropa çempionlar liqasında, “Neftçi” klubu isə “İntertoto” kuboku uğrunda yarışlarda iştirak edəcəkdir.