Qarşılıqlı etimada əsaslanan Azərbaycan-Macarıstan əlaqələri – Təhlil
Bakı, 21 avqust, AZƏRTAC
Dövlətimizin başçısı İlham Əliyevin avqustun 20-də Macarıstanın Baş naziri Viktor Orbanın dəvəti ilə Budapeştə işgüzar səfəri ikitərəfli əlaqələrin inkişafı baxımından mühüm əhəmiyyət kəsb edir. Ümumiyyətlə, bu mühüm məqamı da qeyd etməliyik ki, Mərkəzi və Şərqi Avropa ölkələri ilə ikitərəfli və çoxtərəfli əməkdaşlığın inkişafı ölkəmizin xarici siyasətinin vacib istiqamətlərindən biridir. Qarşılıqlı səfərlər əlaqələrin inkişafında stimulverici amildir. Belə ki, bu səfərlər çərçivəsində keçirilən görüşlərdə tərəfləri maraqlandıran məsələlər ətrafında geniş fikir mübadiləsi aparılaraq səylərin birləşdirilməsi əsas faktor kimi önə çəkilir. Həmçinin imzalanan sənədlər əməkdaşlığın daha da dərinləşdirilməsində hüquqi baza rolunu oynayır.
Prezident İlham Əliyevin Budapeştdə Baş nazir Viktor Orban ilə görüşündə dövlətimizin başçısı diqqəti bu ilin yanvarında Macarıstana səfərinə yönəldərək əldə edilmiş razılaşmaların uğurla həyata keçirilməsindən məmnunluq ifadə edib. Prezident İlham Əliyevin Macarıstanın Baş nazirini Azərbaycana səfərə dəvət etməsini qarşı tərəf böyük minnətdarlıqla qəbul etdi. Görüşdə Azərbaycan ilə Macarıstan arasında enerji, o cümlədən neft-qaz sahəsində əməkdaşlığın uğurla inkişaf etdiyi qeyd olundu, Azərbaycan qazının Macarıstan bazarına çatdırılmasının əhəmiyyəti vurğulandı.
Bu fikirləri AZƏRTAC-a açıqlamasında Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadə bildirib.
O qeyd edib ki, Azərbaycan və Macarıstan geniş iqtisadi potensiala malik ölkələrdir. Ölkələrimiz arasında imzalanmış strateji tərəfdaşlıq haqqında Birgə Bəyannamə, habelə iqtisadi sahəni əhatə edən bir sıra digər sənədlər iqtisadi əməkdaşlığın daha da genişlənməsində əhəmiyyətli baza rolunu oynayır. Macarıstan Azərbaycan ilə enerji sahəsində əməkdaşlığa böyük əhəmiyyət verir və Avropanın enerji təhlükəsizliyinin təminatında ölkəmizin mühüm rolunu daim təqdir edir. Əvvəldə də qeyd etdiyimiz kimi, dost ölkə Cənub Qaz Dəhlizi layihəsini dəstəkləyir və ona qoşulmaqla bağlı marağını ifadə edib. Macarıstan tərəfi Cənub Qaz Dəhlizinin Məşvərət Şurasının illik Nazirlər görüşlərində bir qayda olaraq nazir səviyyəsində təmsil olunur. Ötən il Buxarestdə imzalanan Azərbaycan, Macarıstan, Rumıniya və Gürcüstan Hökumətləri arasında yaşıl enerji sahəsində strateji tərəfdaşlığa dair müvafiq Saziş ölkələrimizin enerji sahəsində əməkdaşlığının daha da dərinləşməsində böyük əhəmiyyətə malikdir.
YAP Xətai rayon təşkilatının sədri onu da qeyd edib ki, avqustun 20-də reallaşan işgüzar səfər Macarıstanın Milli bayramı - Müqəddəs Stefan Gününə təsadüf etdiyindən dövlətimizin başçısı İlham Əliyev və birinci xanım Mehriban Əliyeva bu münasibətlə təşkil olunmuş ziyafətə qatıldılar. Bu mühüm hadisə ölkələrimiz arasında əlaqələrin bugünkü və gələcək inkişafı barədə aydın təsəvvür yaradır. Bu, dostluq, strateji tərəfdaşlıq münasibətlərinin səmimiyyət, qarşılıqlı hörmət prinsipləri əsasında qurulduğunun göstəricisidir. Səfər çərçivəsində Prezident İlham Əliyev və birinci xanım Mehriban Əliyeva Budapeştdə atletika üzrə dünya çempionatının kişilər arasında 100 metr məsafəyə qaçış yarışının finalını da izlədilər.
Vüqar Rəhimzadə bildirib ki, dostluq, əməkdaşlıq və strateji tərəfdaşlıq ruhunda inkişaf edən Azərbaycan-Macarıstan əlaqələrinin daha da genişləndirilməsi ölkəmizin xarici siyasətinin vacib istiqamətlərindəndir. Macarıstan Azərbaycanın strateji tərəfdaşı və Avropa İttifaqında ən etibarlı tərəfdaşlarından biridir. İki ölkə arasında siyasi dialoq yüksələn xətlə inkişaf etməkdədir. Ötən il diplomatik münasibətlərimizin qurulmasının 30 illiyi qeyd edildi. 2004-cü ildə Azərbaycanın Macarıstanda, 2009-cu ildə isə Macarıstanın ölkəmizdə səfirliyi təsis olunub. Bu vaxtadək iki ölkə arasında imzalanan 50-dən çox sənəd müqavilə-hüquq bazasının möhkəmlənməsində mühüm rol oynayır.
YAP Xətai rayon təşkilatının sədri bir vacib məqamı da qeyd edib ki, Azərbaycan tarixi Zəfərimizin reallıqları fonunda işğaldan azad edilmiş ərazilərimizdə genişmiqyaslı bərpa-quruculuq işlərinə başlayan zaman dost ölkələrin də bu prosesdə fəal iştirakı ilə bağlı istəyini ifadə etdi. Dövlət başçısı İlham Əliyevin Macarıstana işgüzar səfəri zamanı bu məsələyə də xüsusi diqqət yönəldildi. Belə ki, Azərbaycanın işğaldan azad edilmiş ərazilərində həyata keçirilən bərpa və quruculuq işlərində Macarıstan şirkətlərinin fəaliyyətə başlaması müsbət addım kimi qiymətləndirildi və bu istiqamətdə daha böyük imkanların olduğu vurğulandı.
Vüqar Rəhimzadə 30 il bundan əvvəl bünövrəsi qoyulan və hazırda strateji tərəfdaşlıq münasibətlərinə qədər yüksələn Azərbaycan-Macarıstan əlaqələrinin qısa təhlili əsasında belə bir ümumiləşdirməni aparıb ki, əlaqələrin qarşılıqlı etimad mühitinin qorunması fonunda inkişaf etdirilməsi uğurlu gələcək barədə aydın təsəvvür yaradır.
Bölmənin digər xəbərləri
