Qaxda “Şuşa İli” çərçivəsində tədbir təşkil olunub
Qax, 8 iyun, Mustafa Dadaşov, AZƏRTAC
Zəngin inkişaf yolu keçmiş Şuşa şəhəri bütün dövrlərdə Azərbaycanın, eləcə də Cənubi Qafqazın ictimai-siyasi və mədəni həyatında müstəsna rol oynayıb. Bu qədim şəhərin Azərbaycan xalqının qəlbində özünəməxsus yeri və dəyəri var.
AZƏRTAC-ın bölgə müxbiri xəbər verir ki, bu fikirlər “Şuşa İli” çərçivəsində iyunun 8-də Yeni Azərbaycan Partiyası (YAP) Qax rayon təşkilatının və şəhid Namiq Allahverdiyev adına Qax şəhər 2 saylı məktəb-liseyin birgə təşkilatçılığı ilə keçirilən “Əziz Şuşa, sən azadsan!” adlı tədbirdə səsləndirilib.
Məktəb-liseydə təşkil olunan tədbirdə YAP rayon təşkilatının, rayon icra hakimiyyətinin, təhsil sektorunun nümayəndələri, məktəbin kollektivi, ziyalılar, şəhid ailələrinin üzvləri, qazilər iştirak ediblər.
Əvvəlcə Azərbaycanın Dövlət Himni səsləndirilib, suverenliyimiz və ərazi bütövlüyümüz uğrunda canını qurban vermiş şəhidlərimizin əziz xatirəsi bir dəqiqəlik sükutla yad olunub.
Tədbiri məktəb-liseyin direktor müavini Faiq Sofiyev açaraq, Prezident İlham Əliyevin müvafiq Sərəncamı ilə 2022-ci ilin Azərbaycanda “Şuşa İli” elan edildiyini, il çərçivəsində bu təhsil ocağında silsilə tədbirlərin keçirildiyini diqqətə çatdırıb.
Şəki-Zaqatala Regional Təhsil İdarəsinin Qax rayon sektorunun müdiri Babək Heydərov Şuşanın Azərbaycan üçün əhəmiyyətindən söz açıb.
YAP Qax rayon təşkilatının sədri Natiq Allahverdiyev çıxışında dövlətimizin başçısının “Şuşa İli” elan edilməsi barədə imzaladığı Sərəncamın xalqımız üçün müstəsna əhəmiyyət kəsb edən tarixi sənəd olduğunu bildirib. Vurğulanıb ki, Şuşa şəhəri tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olub. Hazırda işğaldan azad edilmiş ərazilərdə Prezident İlham Əliyevin, Birinci vitse-prezident Mehriban xanım Əliyevanın rəhbərliyi altında genişmiqyaslı işlər həyata keçirilir. Bərpa və quruculuq prosesinə Heydər Əliyev Fondu daim öz dəstəyini verir. Fond Qarabağda, xüsusilə Şuşa şəhərində tarixi mədəniyyət abidələrinin, dini ziyarətgahların təmiri və bərpası prosesində yaxından iştirak edir.
Rayon İcra Hakimiyyəti Aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Malik Həmzəyev çıxış edərək, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə Zəfərlə başa çatan 44 günlük Vətən müharibəsində qazanılan şanlı Qələbədən danışıb.
Vətən müharibəsi şəhidi Asəf Ağayevin atası Abid Ağayev, Birinci Qarabağ müharibəsi şəhidi Namiq Allahverdiyevin anası Sona xanım, şəhid atası Çingiz Qarayev və digər şəhidlərin valideynləri ərazi bütövlüyümüz uğrunda canlarından keçən qəhrəman övladları ilə qürur duyduqlarını bildiriblər.
Qazilər Mail Məmmədov, Samir Rəşidli çıxış edərək cəbhə təəssüratlarını bölüşüblər.
Tədbirdə məktəb-liseyin şagirdləri doğma Vətənə, torpağa, Şuşaya, şəhidlərə həsr olunan şeirlər səsləndirib, mahnılar, rəqslər ifa ediblər.
Sonda təşkilatçılar tərəfindən şəhid ailələrinə, qazilərə xatirə hədiyyələri təqdim olunub.
Bölmənin digər xəbərləri
