Qaxlı məzunlardan 7 nəfəri qəbul imtahanlarında 600 baldan yuxarı nəticə göstərib
Qax, 6 sentyabr, Mustafa Dadaşov, AZƏRTAC
İlkin məlumata görə, bu il ali məktəblərə daxil olmaq üçün sənəd vermiş 316 nəfər qaxlı məzundan 200 nəfəri tələbə adını qazanıb. Qəbul imtahanlarında məzunlardan 23 nəfəri 500-700 bal arası, o cümlədən 7 nəfər 600 baldan yuxarı nəticə göstərib.
Bu barədə AZƏRTAC-ın bölgə müxbirinə Qax rayonu üzrə təhsil sektorundan məlumat verilib. Bildirilib ki, qəbul imtahanlarında Namiq Allahverdiyev adına Qax şəhər 2 nömrəli məktəb-liseyin məzunu Elgün Hacıxanlı rayon üzrə hamıdan çox - 672 bal toplayaraq Bakı Ali Neft Məktəbinə daxil olub. İmtahanlarda həmin liseyin məzunlarından Abdulla Toğrul 651 bal, Gülnar Mütəllibova 647 bal, Nərgiz Paşayeva 618 bal, Nərmin Musazadə 608 bal, həmçinin İlisu kənd tam orta məktəbin məzunu Pəri Məmmədli 630 bal və Marsan kənd tam orta məktəbin məzunu Leyla Tağızadə 625 bal toplamağa müvəffəq olublar.
Bölmənin digər xəbərləri
